Mayın 10-da ümummilli lider Heydər Əliyevinin dünyaya gəlişinin 100 ili tamam oldu.

Bununla bağlı ölkədə bir sıra tədbirlər həyata keçirildi. Hər kəs onun parlaq xatirəsinə uyğun nəsə etməyə çalışdı. Lakin işi üzünə-gözünə bulaşdıranlar da oldu. Bunlardan biri də “Səbail”di. “Dənizçilər” digər klublarımızdan fərqli bu yöndə fəallıq göstərmək istəyib. Lakin…

Klub mayın 9-da "ASCO Arena"da 2014-15 təvəllüdlü uşaqlar arasında Heydər Əliyevin 100 illik yubileyinə həsr olunan seleksiya xarakterli turnir keçirib. Turnirdə 239, 236, 189, 190 və 51 saylı tam orta məktəblərin şagirdləri və ASCO əməkdaşlarının övladları iştirak edib. Bu tədbir əladı. Uşaqların ölkənin gözəl stadionlardan birində futbol oynamasına şərait yaradıblar. Bəlkə də bu uşaqların arasından gələcəkdə millinin heyətində xarüqələr yaradan hansısa futbolçu çıxacaq. Qısaca, bu təşəbbüsə görə “Səbail”ə təşəkkür etmək olar.

Azərbaycan əla dövlətdi. Hər şeyə uyğun bir atalar sözü var. Mənim üçün ən maraqlısı “artıq tamah baş yarar” misalıdı. Bax, bu kəlam sırf “Səbail” üçündü. Adama deyərlər ki, yuxarıda qeyd etdiyim tədbiri keçirmisən, nəyə lazımdı ikincisi? Guya bunlar sosial layihə çərçivəsində iş gördüklərini isbatlamaq istəyiblər. Məsələ nədi? Mayın 10-da "Suraxanı Gəmi-muzeyi"ndə ASCO, "Suraxanı Gəmi-muzeyi" və "Səbail"in təşkilatçılığı ilə ümummilli liderin 100 illik yubileyinə həsr olunan "Futbol dalğası" festivalı keçirilib. Tədbirdə Rahid Əmirquliyev, Ağabala Ramazanov, Emil Balayev, Emil Martinov və Matiya Lyuyiç iştirak edib. Futbolçular iştirakçılarla birgə əla vaxt keçirib və onlara imzalı şəkillərini verib. "Futbol dalğası" festivalı çərçivəsində Kriştiano Ronaldonun "Səbail"də təqdimatı baş tutub! Şoka düşdüz? Bəli, belə də olub. Sadəcə, özünün yox, maskotunun. Necə də kreativ yanaşmadı! Bunu hansı ağılllı düşünüb? Ronaldonun maskotuna təqdimat keçirmək nədi? Həqiqətən düşünürsüz ki, bu kreativdi? Pul verərək tədbirinizə dəvət etdiyiniz Nuqzar Kvirtiyanın sosial şəbəkə hesablarında Ronaldonun maskotuna təqdimat keçirməyinizi düşüklük adlandıran nə qədər adam var. Camaat sizi “feysbuk”da, “instaqram”da, “tik-tok”da lağa qoyur. Heç bunlara baxanda utanmırsız? Görəsən, “Səbail” rəhbərliyinin tədbirin planından xəbəri olmayıb? Müşahidə Şurasından və ya İdarə Heyətindən kimsə “ay camaat, Ronaldonun maskotunun təqdimatını keçirmək ulu öndər, ümummilli lider Heydər Əliyevin 100 illik yubliyinə yaraşmayan hərəkətdi. Bizi el-aləmə biabır etməyin” deyən olmayıb? Tədbirdəki şəkillərə baxanda adamda belə təəssürat yaranır ki, 1 iyun - Uşaqlar Günü ilə bağlı festivaldı. Amma bu, belə deyildi. Heydər Əliyevin 100 illik yubleyi ilə bağlı keçirilən tədbirlər sanballı olmalı, ağırlığını qorumalıdı.

Yaxşı, kimdi günahkar? Normal qurumlarda belə tədbirləri Marketinq və İctimaiyyətlə Əlaqələr Departmenti təşkil edir. Biz “Səbail”i normal klub sayırıq. Bununla bağlı hansısa problemimiz yoxdu. Deməli, bu tədbiri marketinq departamentinin rəhbəri və əməkdaşları təşkil edib. Məsələ aydın oldu. Yəqin ki, futbol ictimaiyyətində lağ-lağı predmetinə çevrildiklərinin fərqindədilər. Ümid edirəm ki, Heydər Əliyevin 100 illik yubleyi ilə bağlı belə tədbir keçirdikləri üçün utanırlar. Amma… “Sumqayıt”la oyunun afişasında Mirabdulla Abbasova tuşlanmış silahlardan şəkil kimi istifadə edən marketinq departamentinindən bundan artığını gözləmək də sadəlöhvlükdü.

İLKİN SULTANLI