Azərbaycan Kanoe və Avarçəkmə Federasiyasının təşkilatçılığı ilə işğaldan azad olunan torpaqlarımızda ilk beynəlxalq turnir keçiriləcək.

“Football-plus.az” saytının məlumatına görə, mayın 6-7-də ümummilli lider Heydər Əliyevin anadan olmasının 99-cu ildönümünə həsr olunan avarçəkmə üzrə “Prezident kuboku-2022” baş tutacaq. Turnirdən öncə Mingəçevirdə komandaların paradı təşkil olunub. Yarış iştirakçıları keçiddən sonra Heydər Əliyevin abidəsini ziyarət ediblər. Reqatanın açılış mərasimi və ilk yarış günü Suqovuşanda olacaq.

Azərbaycan ilə yanaşı, Türkiyə, Gürcüstan, Moldova və Özbəkistandan 100-dən artıq avarçəkənin qatılacağı turnirdə idmançılar mayın 6-da Suqovuşan su anbarında kayak və kanoe növlərində mübarizə aparacaqlar. Mayın 7-də Mingəçevirdəki “Kür” Olimpiya Tədris-İdman Mərkəzində akademik avarçəkmə üzrə qaliblər müəyyənləşəcək. “Prezident kuboku-2022” turnirinə Heydər Əliyevin həyat və fəaliyyətinə həsr edilən su üzərində 3D effektli şou və atəşfəşanlıqla yekun vurulacaq.

RƏŞAD, Mingəçevir