Məşhur isveçrəli filosof, şair və tənqidçi Anri-Frederik Amiyelin bir maraqlı kəlamı var: “Ən təhlükəli yanlışlıq həqiqətə oxşayandı”.

Bu fikir hazırkı dövrümüzə daha çox aiddi. Çünki müasir texnologiyalar, dünyada baş verən proseslər insanları məcbur edir ki, özləri üçün həqiqətə bənzəyən yalanlar tapsınlar. Bununla da gözlənilən təhlükələrdən, tənqidlərdən “sığortalanmaq” olur.

Futbolumuzda da belə proseslər tez-tez baş verir. Məsələn, elə premyer-liqanın 35-ci turunun 4 oyununun vaxtının dəyişdirilməsi. PFL-in texniki-idman direktoru Elgiz Abbasov qəzetimizə açıqlamasında bildirdi ki, Astarada keçiriləcək 3x3 basketbolu üzrə beynəlxalq turnirə görə təqvimdə dəyişiklik olub.

Bəli, bu həqiqətdi. Amma böyük yanlışlıqdı. Nə üçün? Çünki bu qərar bir çox fəsada yol açır.

Baxın, görüşlər bazar ertəsi, saat 16.30-da start götürəcək. Bu da o deməkdi ki, oyunları barmaqla sayılacaq qədər azarkeş izləyəcək. Çünki ölkə əhalisinin yarıdan çoxu işdə olacaq. Nə qədər insan premyer-liqa matçlarına görə öz müdirindən icazə ala bilər ki? Bunun nəticəsində bu turun oyunları maraqsız olacaq. Çünki futbolu gözəlləşdirən fanatlardı.

İkinci məqam isə ictimaiyyət arasında PFL-in nüfuzunun aşağı düşməsidi. Qurum son illərdə gördüyü işlərlə müsbət imic qazanıb. Belə qərarlar isə onun adına xələl gətirir. Başqa federasiyanın tədbirinə görə ölkənin əsas futbol çempionatının oyunlarının vaxtının dəyişdirilməsi fiaskodu.

Bütün dünyada əsas idman növü futbol sayılır. Ölkələrdə baş verən proseslər bura təsir etmir. Çox uzağa getməyək, Türkiyədəki seçkiyə görə UEFA Çempionlar Liqasının finalının yerini dəyişmək istəyirdi. Lakin TFF siyasətlə futbolun bağlı olmadığını ön plana çəkərək, Avropanın ali futbol qurumuna mövqeyini çatdırdı.

Baxın, Türkiyədə hakimiyyət dəyişə bilər. Buna görə də iğtişaşların baş vermək ehtimalı da var. Amma TFF dedi ki, mən bu yarışı keçirəcəm. PFL nə edir? Bir dəfə “Formula-1”ə, indi isə basketbol yarışına görə çempionat oyunlarının vaxtını dəyişməyə asanlıqla razı olur. Niyə? Çünki “CBC Sport”un efir qrafikində problem yaranır. Olmazdı ki, adı çəkilən telekanal basketbol üzrə beynəlxalq turnirin yayınını “İdman TV”yə həvalə etsin?

Başa düşürəm, əvvəlcədən müqavilə bağlanılıb. Şərtlərə görə turnir yayınlanmalıdı. Onda heç olmasa, premyer-liqanın görüşləri CBC kanalında və ya rəsmi sayt vasitəsi ilə yayınlanardı. Onsuz da basketbolla bağlı turnir dövlət tədbiri olduğu üçün çəkilişi “Baku Media Centre” edir. İstənilən variant axtarmaq olardı. Amma telekanalın işləri rahat olsun deyə, PFL-dən Misli premyer-liqasının oyunlarının vaxtının dəyişdirilməsini istəyiblər. Qurum da bunu qəbul edib.

Axı niyə? Çünki bizim üçün futbol arxa plandadı. Çünki bizdə premyer-liqa yüksək səviyyədə keçirilmir, yola verilir. Çünki bu ölkənin futbol təsərrüfatında olanlara azarkeşlərin oyunlara az və ya çox gəlməsi maraqlı deyil. Çünki bizim futbolun başbilənləri bu idman növündəki çətinlikləri yola verməklə həll edir.

İLKİN SULTANLI