“Əməliyyatdan sonrakı dönəm yaxşı keçdi. Müalicə davam edirdi. Günü-gündən əvvəlki potensialımın geri döndüyünü hiss edirdim. Ürəkaçan səbəbdən olmasa da, istirahətə vaxtım oldu. Bundan sonrakı planları düşündüm. İşimin başına daha tez dönmək istəyirdim, lakin həkim icazə vermirdi. Hər fürsətdə gedib uşaqlarla maraqlanırdım, məşqləri izləyirdim, ayaqüstü məsləhətlər verməyə çalışırdım. İlqar müəllim sağ olsun, ona əmanət olunan işin öhdəsindən layiqincə gəlmək üçün əlindən gələni etdi. Nəhayət, mayın əvvəlində həkim artıq sağlamlığımda problem qalmadığını və işləmək üçün tam hazır olduğumu təsdiqlədi. Şükürlər olsun ki, hər şey qaydasındadı. Milliyə 1 aylıq istirahət verdim. İyunun əvvəlində yenidən toplaşacağıq. Rusiyanın Kazan şəhərində avqustun əvvəlində keçiriləcək MDB Oyunlarında iştirakımız planlaşdırılır. Bu turnirə ciddi hazırlaşacağıq. Hələ dəqiqləşməsə də, bölgələrdən birində təlim-məşq toplanışı baş tutacaq. Bu dəfə yaxşı nəticə qazanmaq şansımız daha yüksəkdi. Çünki milli Avropa çempionatının seçmə mərhələsində keçirilən oyunlar zamanı təcrübə qazandı. Bununla yanaşı, məşqlər də faydalı olub. Xatırlayırsızsa, bir neçə il öncə gəncləri bir araya yığıb komandanı sıfırdan formalaşdırdım. Başqa ölkələrdə aşağı yaş qruplarının təcrübəsi bizə nisbətən daha çoxdu. Əksəriyyətinin əzmkarlığı, sürəti, istəyi qaneedici deyildi. İndi görürəm ki, xeyli irəliləyiş var. MDB oyunlarından sonra - təxminən avqustun sonunda komandadan buraxılacaqlar. Bu sahə üzrə fəaliyyət göstərsələr, sərbəst məşqlərə davam etsələr, yaxşı nəticələrə imza ata bilərlər. Builki yığma digər illərə nisbətən ən zəif çıxışla yadda qaldı. Bunu qəbul edirəm. Təlim-məşq toplanışlarında iştirak edə bilmədik. Avropa çempionatının seçmə mərhələsindən öncə sağlamlığımda yaranan problem də milliyə mənfi təsir göstərdi. Hazırlaşmaq üçün vaxt yox idi, üstəlik ifrat həddə təcrübəsizlik… Təsəvvür edin, top saxlamağı, ötürmə verməyi bilməyən uşaqları beynəlxalq oyunlara hazırlamaq necə çətin işdi. Xüsusən hazırlıq mərhələləri ağır keçir. Tək-tək hər birini yoxlamaq, şanslarını dəyərləndirmək səbr və diqqət tələb edir. Amma növbəti mövsüm üçün ümidliyəm. Bu dəfə sıfırdan yox, yeni qurulan U-17 yığmasından yaxşı uşaqları seçib götürmək imkanım olacaq. Ən azı topla davranış qaydalarını biləcəklər. Fiziki cəhətdən dinamik oyunlara öyrəşmələri üçün daha az zaman lazım olacaq. Daha təcrübəli heyət qurmaq imkanı yoxdu. İşi bilən adamlar yığmaya gəlmir, nə də klublar belə addımlara şərait yaratmır. Ümumiyyətlə, gənclərin əksəriyyətində fiziki hazırlığın aşağı olduğu heç kimə sirr deyil. Həmişə deyirəm, trenajorlara gedin, evdə məşqlər edin, günü hərəkətli keçirməyə çalışın. Lakin dinləyən azdı. İnşallah, yaxşı olar”.