“İlk iki oyunu izləməyə imkan tapsam da, son qarşılaşmaya baxa bilmədim. Müşahidələrim zamanı komandanın əvvəldən sona qədər qələbə uğrunda mübarizə apardığını gördüm. Öyrətdiklərimizi can-başla yerinə yetirirdilər. Təəssüf ki, məqsədimizə nail ola bilmədik. Rəqiblərimiz çox güclü və təcrübəli idi. Bizim komanda cəmi 7 aydı zalda məşqlərə başlayıb. İlk 2-3 ayda isə futzalın “əlifba”sını öyrəniblər. Sadəcə, ölkə çempionatında çıxış etmişik. Beynəlxalq təcrübəmiz isə sıfra bərabərdi. Məsələn, Fransa yığmasının son üç ayda 20 beynəlxalq qarşılaşmada meydana çıxdığını bilirik. Bosniya və Hersoqovina da təcrübəlidi. Biz isə həm fiziki, həm də oyun praktikası cəhətdən çox geri qalırıq. Yeni qurulan heyətin beynəlxalq arenada uğur qazanması çətindi. Yanlarında olmamağım da uşaqlarda müəyyən gərginlik yaradıb. Tez-tez telefonla zəng edib çətinlik çəkdiklərini deyirdilər. İlqar Aslanov çox təcrübəli məşqçidi. Var qüvvəsi ilə komandanı oyuna hazırlaşdırdığına və məşqlərin çox faydalı keçdiyinə əminəm. İnanmıram ki, bu uğursuzluq məhz onun potensialı ilə bağlı olsun. Növbəti il U-19 üçün daha təcrübəli, məşqlərdə özünü sübut etmiş və zal praktikası olan oyunçulara üstünlük verəcəyik. Təəssüf ki, indi yığma yaratmaq qəliz məsələdi. Buna baxmayaraq, hədəflərimiz böyükdü. Ümid edirəm ki, gələn il müsbət dəyişikliklər ediləcək və yaddaqalan nailiyyətlərimiz olacaq”.