Bugünlərdə Türkiyədə böyük bir fırıldaqçılığın üstü açılıb. Qalmaqalın bir ucu Fatih Terim başda olmaqla futbol dünyasının məşhur simalarına qədər gedib çıxdığına görə hadisə qardaş ölkədə geniş əks-səda doğurub.

"Football-plus.az" xəbər verir ki, olayın baş “qəhrəmanı” Seçil Erzan adlı xanımdı. Bu xanım 2012-ci ildən bir bankın Floryadakı şöbəsinin müdiri kimi çalışırmış.

Türkiyə mətbuatında bankın adı, demək olar, heç bir mənbələrdə açıqlanmasa da, söhbət “Dəniz Bank”dan gedir. Çalışdığı müddətdə “Qalatasaray”ın bəzi rəsmilərinin və futbolçularının bankla bağlı işlərini həll edərək onların etibarını qazanan Erzan daha sonra varlı müştərilərlə tanış olaraq “tarixi” bir fırılaqçılıq planını həyata keçirməyə başladı. O, qapalı bir fond sistemi və ya sadə dillə desək, “piramida” yaratmaq fikrinə düşdü.

Ölkəmizdə də tez-tez müxtəlif “ağıllı” insanlar tərəfindən qurulmuş belə sistemlərin çökməsi barədə məlumatlar eşidirik. “Piramida” daim yeni insanların və para axınının hesabına böyüyən sistemdi. Bura ilk daxil olanlar qoyduqları pulu artıqlamasıyla götürürlər. Amma həmin insanlar özləri ilə birlikdə bura başqalarını da cəlb edirlər və sistem zəncirvari şəkildə böyüməyə başlayır.

Məhz elə bu böyümə sistemin sonunun başlanğıcı olur. Yeni cəlb olunanların sayı azaldıqca “Piramida”da olanların gəlirləri azalmağa başlayır. İnsan sayı gec-tez məhdudlaşdığından sonda sistem iflas edir!

Seçil Erzan işə Fatih Terimi cəlb etməklə əslində strateji cəhətdən çox mühüm bir uğura nail olmuşdu. Çünki işin içində Terim kimi nüfuzlu şəxs varsa, bunun sayəsində başqalarını da sistemin ciddiliyinə inandırmaq mümkün idi. Əslində “İmperator” pula hərisliyin yox, dostluğa önəm verməyin qurbanı olub. Çünki Seçil Erzan Terimin vəkili Candaş Gürolun sevgilisi idi! Yəni onlar bir-birini çoxdan tanıyırdı. İddiaya görə Terim və ailə üzvləri bu sistemdə 10 milyon dollar, Arda Turan 8 milyon dollar itirib!

Bəli, düz oxuduz, söhbət lirədən yox dollardan gedir. Seçil Erzanı xeyrinə olan məqam onun bank işçisi olmasında idi. Çünki o, pul aldığı insanlara üzərində bütün imzaları olan bank sənədləri təqdim edirdi. Amma dərd orasındadı ki, bankın özünün bundan xəbəri yox idi. Yəni bütün imzalar və sənədlər saxta idi. Deyilənə görə, bir ara sistemdə 50-80 milyon dollara qədər pul fırlanıb!

Seçil Erzanın bir neçə il davam edən bu fırıldağını ifşa edən isə bir iş adamı oldu. Adı açıqlanmayan iş adamı ötən ilin noyabrında Erzana içində 5 milyon dollar olan bir çanta verdi. Başına daha öncə bənzər hadisə gəldiyi üçün həmin şəxs çantanın içinə GPS cihazı qoyduraraq onu izləməyə başladı.

Məlum oldu ki, çanta bankda təxminən yarım gün qalandan sonra hava limanına göndərilib və daha sonra başqa bir evə aparılıb. İş adamı xanıma zəng vuraraq pulunu geri istədikdə “ödəmə vaxtı çatmadığı üçün sizə ödəniş edə bilməyəcəyik” cavabı ilə qarşılaşınca birbaşa polis şöbəsinə yollanıb. Artıq sistem dirənmişdi və müştərilərə nəinki faizi ilə, heç öz pullarını da qaytara bilmirdi.

İş adamının şikayətindən sonra prokurorluq da məsələyə qarışınca hər şeyin üstü açıldı və Seçil Erzan dərhal həbs olundu. Digər qurbanlar da bu xanımdan şikayət edincə, işin içində Əmrə Belözoğlu, Fernando Muslera, Səlcuk İnan, Semih Kaya, eləcə də Terimin qızı Buse Bahçekapılı və onun həyat yoldaşı Volkan Bahçekapılı kimi isimlərin olduğu da üzə çıxdı. Hətta Musleranın son turlardakı inamsız oyununu bu hadisə ilə əlaqələndirənlər də var. Çünki deyilənə görə, məşhur qapıçı 2 milyon dollara yaxın pul itirib!

Seçil Erzanın ilkin ifadəsi də ortaya çıxıb. Sən demə, o özü də bənzər bir sistemin qurbanı olandan sonra bu fırıldağa əl atmaq qərarına gəlib: