Türkiyə futbolunun və “Qalatasaray”ın əfsanəsi Fatih Terim hazırda Qətərdədi.

O, mundialda yarımfinal matçlarından öncə xüsusi qonaq qismində Qətərə dəvət olunub. Srağagünkü Argentina – Xorvatiya matçından öncə Terim məşhur türkiyəli aşpaz Burak Özdəmirin restoranını ziyarət edib. Sosial şəbəkələrdə böyük populyarlığa malik “CZN Burak” ləqəbli Burak Özdəmirin “instaqram”da 42 milyondan çox izləyicisi var! Onun restoranlarını faktiki dünyanın ən tanınmış idmançıları və futbolçuları ziyarət edir. Təsadüf nəticəsində Terim Özdəmirin restoranına baş çəkərkən həmin vaxt dünya futbolunun əfsanəsi Ronaldinyo da orda olub. Bu ikili bir masa arxasında əyləşərək bir müddət söhbət ediblər. Terim öz səhifəsində Ronaldinyo ilə olan şəklini paylaşaraq “DÇ-də köhnə dostlar, tanış simalar görmək və onlarla söhbət etmək həmişki kimi çox keyiflidi” ifadəsini yazıb. Elə Burak Özdəmir də iki pide bişirərək onlardan birinin üstünə Ronaldinyonun adını, digərinin üstünə “İmperator” sözünü yazaraq hər iki əfsanə ilə şəkil çəkdirib.