“Formula-1” üzrə dünya çempionatında yeni mövsümə böyük ümidlərlə başlayan pilotlardan biri də Karlos Saynsdı.

“Ferrari”nin ispaniyalı pilotu test yarışlarında komanda yoldaşı Şarl Leklerdən daha yaxşı təsir bağışlayır. Ancaq ölkəsinin mediasına müsahibə verən Sayns belə müqayisələrlə məşğul olmamağı məsləhət görüb.

- Testlərin gedişi haqda nə deyə bilərsiz? Təkərlərin mümkün deqradasiyası sizi narahat edirmi?
- Yox. Əslində hər şey yaxşı gedir. Ən müxtəlif sınaqlardan keçirik, harda mümkündüsə, orda da maksimuma nail olmağa çalışırıq, müxtəlif tənzimləmə variantları ilə maşının necə çalışdığını yoxlayırıq. Sözsüz, artıq çox şeydən baş çıxarıram, SF-23 maşınını öyrənmək prosesi davam edir və bu mənə məmnunluq yaşadır. Ümid edirəm ki, bundan sonra da tərəqqini davam etdirəcəyik.

- Kənardan belə görünür ki, komanda yoldaşınızla müqayisədə yeni maşına daha yaxşı uyğunlaşmısız.
- Yox, mənə elə gəlir ki, bunu, ümumiyyətlə, müqayisə etmək olmaz. Mən dünən səhər maşını yoxladım, onda trass nəzəri cəhətdən bir qədər “ləng” ola bilər, o isə günün ikinci yarısında çalışdı – onda hava həm sərin idi, həm də küləyin istiqaməti dəyişmişdi. Bir sözlə, dəqiq demək çətindi.

- SF-23 ötənilki maşınla müqayisədə sürücülük üslubunuza daha çox uyğun gəlir?
- Hələ ki bunu bilmirəm. Axı hələ təsnifat rejimində maşının imkanlarının son həddini yoxlamamışam, ondan maksimumu almağa çalışmamışam. Ötən il mövsümün əvvəlində komanda yoldaşıma azacıq uduzurdum. Aydın məsələdi ki, testlərin gedişində maşının hansısa ehtiyatının olub-olmadığını, nə dərəcədə “artıra” biləcəyimi müəyyənləşdirmək çətindi. Mövsümün ilk yarışına imkan daxilində yaxşı hazırlaşmağa çalışıram. Tənzimləmələrin müxtəlif variantlarını təhlil etməklə, sürücülük üslubumu təkmilləşdirməklə ümid edirəm ki, bütün bunlar mənə daha yaxşı çıxış etməkdə yardımçı olacaq. 2022-nin yazında – ilk mərhələdə maşının hansı yanaşma tələb etdiyini, hansı tənzimləmələrin uyğun olduğunu bilmirdim. Odu ki, testlərdə qarşımda duran əsas vəzifə optimal balans axtarışı prosesində nəyə nail olmaq istədiyimi dəqiq müəyyənləşdirmək, sürücülük üslubuma dair qərar verməkdi. Təəssüf ki, ötən ilin əvvəlində məndə heç də hər şey alınmadı. Hansı səbəblərdən alınmadığı haqda isə danışmaq istəmirəm.

- Həmişə olduğu kimi, testlər əsasında nəticə çıxarmaq çətindi? Ona görə ki, bütün komandalar öz proqramı əsasında çalışır.
- Həmişə komandanın prioritet saydığı vəzifələr var. Maşınların sonrakı modernləşməsi müəyyən aspektlərdən asılıdı, komandalar bu məqama xüsusi diqqət yetirir. Biz də hər şeyi bir-bir təhlil edirik ki, sonrakı planlarımızı qura bilək. Testlərdə qarşıya məhz belə vəzifələr qoyulur, mövsümün ilk yarışına belə hazırlaşmağa çalışırıq.

- Rəqiblərdən hansı sizi daha çox təəccübləndirdi?
- Sirr deyil ki, “Red Bull” çox inamlı görünür. Onların çox sürətli maşınının olduğu aydındı. “Red Bull”un maşını artıq bizim ötənilki sürətimizi arxada qoyub, irəli bir addım da atsalar, onlara qalib gəlmək çətin olacaq. Bununla belə, qarşıda duran əsas vəzifə elə bu detalda gizlənir – rəqiblərlə müqayisədə daha tez tərəqqi etməliyik.

- “Ferrari”nin potensialı haqda nə demək olar?
- Hələ ki xüsusi heç nə. Maşın ötənilkindən fərqlənsə də, dəyişikliklər o qədər də böyük deyil. Yırğalanma davam edir, ancaq bu proses bütün komandaların maşınlarında var. Yeri gəlmişkən, bu həm də ona görə baş verir ki, bəzən biz özümüz də bilərəkdən yırğalanmaya can atırıq. Hər şey hansı vəzifələri həll etmək istədiyinizdən asılıdı. Beynəlxalq Avtomobil Federasiyasında ümid edirlər ki, bu problem artıq geri dönməyəcək, ancaq aydındı ki, komandalar istəsələr, yırğalanmaya meyl edə bilərlər. Bir sözlə, mən hələ ki hansısa qənaətə gəlmək istəmirəm.