Leklerin saatını oğurladılar
Həftəsonu “Formula-1” üzrə dünya çempionatında 4-cü – İtaliya mərhələsi keçiriləcək.
Bu üzdən avtoidman dünyası ilə bağlı xəbərlərin sayının artması təbiidi. “Red Bull”un məsləhətçisi Helmut Marko son çempion Maks Ferstappenin 2022 mövsümünü necə keçirməsi haqda danışıb:
“Yeni bolidin özəlliklərini nəzərə alsaq, Maksda bəzən sükan arxasında özünəinam çatmır ki, ona xas olan aqressiv sürücülük üslubunu davam etdirsin. Gördüyünüz kimi, bu səbəbdən Serxio Peres ona yaxınlaşa bilib. Bununla belə, Maks daha sakit olub. Məsələn, pilotumuz trassda mübarizədən çəkiləndən sonra boksa qayıdır və biz sakitcə hər şeyi müzakirə edirik. Maks həmişə fikrini deməyə hazır olan, çox emosional və ehtiraslı pilotdu. Ancaq fikrimcə, ötən illə müqayisədə indi daha sakitdi. Digər tərəfdən, tezliklə qələbə qazanmağa başlamasaq, Maks saat mexanizmli bombaya çevriləcək”.
Xatırladaq ki, ilk üç mərhələdən sonra 25 xalla şəxsi hesabda 6-cı yerdə qərarlaşan Ferstappen lider Şarl Leklerdən 46 xal geri qalır.
Bu arada Karlos Sayns ilə “Ferrari” müqavilə müddətinin uzadılması mövzusunda razılığa gəlib. Yeni müqavilə 2024-cü ilin sonuna qədər nəzərdə tutulacaq. Müddətin uzadılması ilə bağlı açıqlama yaxın günlərdə veriləcək. 2021-ci ildən “Ferrari”nin şərəfini qoruyan Sayns ilk üç mərhələdən sonra 33 xal toplamaqla şəxsi hesabda 3-cü yeri tutur.
Lider Lekler isə trassda yox, ondan kənarda macəra ilə üzləşib. “La Gazzetta dello Sport” pilotun fiziki hazırlıq üzrə məşqçisi Andrea Ferrariyə istinadla xəbər verir ki, naməlum şəxslər gəzinti zamanı pilotu qarət edib. İnsident bazar ertəsi, axşam saatlarında İtaliyanın Viareco şəhərində baş verib. Lekler fiziki hazırlıq üzrə məşqçisi və dostları ilə birgə axşam gəzintisinə çıxıbmış. Naməlum şəxslər özlərini pilotun fanatı kimi tədqim edərək, şəkil çəkdirmək istəyib. Bu əsnada onlar Leklerin dəyəri bir neçə min avro olan “Rolex” markalı saatını oğurlayıblar. İdmançı özünü fanat kimi təqdim edənlər aradan çıxandan bir neçə dəqiqə sonra saatını oğirlandığının fərqinə varıb. Viareco polisi təhqiqata başlayıb.
Daha bir maraqlı xəbər odu ki, “Formula-1” üzrə dünya çempionatında yarışan üç komanda Beynəlxalq Avtoidman Federasiyasına müraciət edərək, “Ferrari” və “Haas” bolidləri arasındakı oxşarlıqların öyrənilməsini xahiş edib. “Auto Motor und Sport” xəbər verir ki, quruma belə tələbin “Maklaren”, “Aston Martin”, “Alpin” və ya “Mersedes”dən daxil olması mümkündü. Bəzi komandaların rəhbərləri artıq dəfələrlə “Ferrari” ilə “Haas” arasındakı sıx əməkdaşlıqladan narazılıq ediblər.
“Formula-1” çempionatında 2016-da debüt edən “Haas” “Ferrari” mühərrikindən və sürət qutusundan yararlanır. Həmçinin xərclər tavanı müəyyənləşəndən sonra 25 mühəndis “Ferrari”dən “Haas”a keçib.
Digər xəbərlər
