Qadın şahmatçılar arasında ölkə çempionatına yekun vurulub. Mükafatçıların siyahısı sonuncu – 11-ci turda müəyyənləşib. Gövhər Beydullayeva ardıcıl ikinci dəfə Azərbaycan çempionu olub.

14 fevral
11-ci tur
Nərmin Abdinova - Xanım Balacayeva 0,5:0,5
Gülnar Məmmədova - Ayan Allahverdiyeva 1:0
Türkan Məmmədyarova - Nurtən Nuriyeva 1:0
Xəyallə Abdulla - Ləman Hacıyeva 1:0
Gövhər Beydullayeva - Zeynəb Məmmədyarova 1:0
Yekun sıralama: 1. Beydullayeva – 7,5, 2. Balacayeva – 7, 3. Səbinə İbrahimova - 6,5, 4. Abdinova – 6, 5. Abdulla – 5,5, 6. Məmmədova – 5,5, 7. Allahverdiyeva – 5, 8. T.Məmmədyarova – 5, 9. Hacıyeva – 3,5, 10. Z.Məmmədyarova – 2, 11. Nuriyeva – 1,5.

Gövhər Beydullayeva yarışdan sonra AŞF-nin rəsmi saytına müsahibə verib. Onun söylədiklərini müəyyən ixtisarla diqqətinizə çatdırırıq.

- Azərbaycan çempionatının səviyyəsini necə qiymətləndirirsən?
- Güclü yarış idi. 6 qrossmeyster, həmçinin gənc şahmatçılar güclü mübarizə nümayiş etdirdi. Əslində yarış mənim üçün uğurlu keçmədi. Şükür ki, sonda çempion olmağı bacardım. Sadəcə, tam ürəyimcə olmadı.

- Hər halda, nəticədən razısan?
- Nəticədən razıyam. Son turlarda lazımi nəticələri qazanmaqla birinci yeri təmin etdim.

- Ardıcıl ikinci dəfə Azərbaycan çempionatının qalibi oldun. Hansı ildə qələbə qazanmaq daha çətin idi?
- Ötən il yarış 7 turdan ibarət oldu. Onda da startda ardıcıl 3 qələbə qazanmışdım. Bu il 10 tur oynadım. Fərqləndirmək çətindi. Bəlkə də builki yarış daha güclü idi. Çünki son tur ərəfəsində 4 şahmatçı çempionluq şansını saxlayırdı.

- Rəqiblərin çıxışı haqda nə deyə bilərsən?
- Ölkə çempionatına bütün şahmatçılar güclü hazırlaşmışdı. Günay Məmmədzadə və Ülviyyə Fətəliyevadan başqa milli komandadakı digər həmkarlarım bu yarışda iştirak etdi. Gülnar Məmmədova, Xanım Balacayeva yaxşı mübarizə sərgilədi. Gənc şahmatçılardan danışmaq istərdim. Nərmin Abdinova, Ayan Allahverdiyeva yaxşı oynadı. İnanıram ki, gələcəkdə daha yaxşı oynayacaqlar və reytinqlərini artıracaqlar.

- Kim səni yaxşı mənada təəccübləndirdi?
- Nərmin Abdinovanı qeyd edə bilərəm. Yaxşı şahmatçı olduğunu bilirdim. Amma çempionatda yetərincə maraqlı oyun göstərdi. Onunla görüşdə qalib gəlməyimə baxmayaraq, çox çətinlik çəkdim. Sanki mənim uşaqlıqda oynadığım kimi mübarizə aparırdı.

- Son tura gələndə kimlər sənə dəstək oldu?
- Dostlarım yazmışdı. Aydın Süleymanlı və Məhəmməd Muradlı dəstək oldu. Aydın yazmışdı ki, sən bunu bacaraqsan. Hər ikisinə təşəkkür edirəm.

- Martda şəxsi Avropa çempionatında iştirak edəcəksən. Qitə birinciliyində əsas hədəf nə olacaq?
- Avropa çempionatında həm də dünya kubokuna vəsiqə uğrunda mübarizə olacaq. Amma dünya kubokunda iştirakım dəqiqləşib. 20 yaşadək şahmatçıların dünya çempionatında qələbə qazanmaqla bunu təmin etmişəm. Ölkə çempionatında 2400 əmsalı keçə bilmədim. Avropa çempionatında çalışacam reytinqimi artırım və mükafatçılar sırasında yer alım.

- Gənclər arasında dünya çempionluğundan sonra həyatında nə dəyişdi?
- Bu qədər diqqət olacağını gözləmirdim. Bakıya qayıdandan sonra bir həftə, demək olar, bütün telekanallarda qonaq oldum. Diqqətə görə hamıya təşəkkür edirəm. Ciddi dəyişiklik olduğunu deməzdim. Sadəcə, bəzən küçədə tanıyırlar, şəkil çəkdirirlər.