Eddi İrvayn vaxtilə “Formula-1” dünyasında sayılıb-seçilən pilotlardan idi, “Ferrari”də Mihael Şumaherə tərəfdaşlıq edirdi. İrlandiyalı sabiq pilot “Gazzetta dello Sport”a verdiyi müsahibədə bəzi məsələlərə aydınlıq gətirib.
- İndiki “Ferrari” haqda nə düşünürsüz?
- Fikrimcə, komanda mövsümə əla başlayıb. İlk iki mərhələdə hər iki pilot fəxri kürsüyə qalxdı, Bəhreyndə qələbə qazanan Şarl Lekler Səudiyyə Ərəbistanında da bu uğuru təkrarlaya bilərdi. Odu ki, komanda əla təsir bağışlayır.
- Vaxtilə şərəfini qoruduğuz “Ferrari” ilə hansısa ümumi cizgilər görürsüzmü?
- Mattia Binotto istisna olmaqla bu komandadan heç kimi tanımıram. Ancaq xatırlayıram ki, məsələn, 2000 mövsümünə hazırlığa çox tez başlamışdıq. Onda yayda Silverstounda Mihaelin ayağı qırıldı, sonra mən qələbələr qazanmağa başladım.
- Binottonun adını çəkdiz – həmin vaxt necə adam idi?
- Həmişə tam sakit idi, güclü təlaşlandığı anı xatırlamıram. Ancaq hətta indi də necə belə rahat olduğunu anlaya bilmirəm. O, əsl uğurlara nail olub. “Ferrari”də işləmək asan deyil, Binottonun komandanın rəhbəri kimi qalması çox doğru qərardı. Bu isə o deməkdi ki, Maranelloda, nəhayət, varislik ənənələrinin qorunmasının necə vacib olduğunu anlayıblar. Komandaya yalnız vaxt vermək lazımdı. Məsələn, Jan Todt “Ferrarri”yə 1993-cü ildə gəldi, komanda isə Mihael Şumaher kimi pilota malik olmasına baxmayaraq, yalnız 7 il sonra titul qazandı. Qələbələrə aparan yol uzundu, bu üzdən hesab edirəm ki, Mattia çox iş görüb. Ona görə sevinirəm. Mattia test briqadasının mühəndisi kimi işə başladı, ancaq tədricən komandanın rəhbəri vəzifəsinə yüksəldi. Hesab edirəm ki, o çox şeyə nail olub.
- Binotto bir neçə il əvvəl demişdi ki, Şarl Lekler pilot kimi Ferstappendən yaxşıdı. Necə güman edirsiz, o, həmişə belə düşünür? Baxmayaraq ki, Maks ötən il dünya çempionu oldu.
- Düşünmürəm ki, “Formula-1”də sürətə görə Ferstappeni qabaqlayan pilotlar var. Ancaq niderlandlı hələ də səhvlər edir, Lekler isə yox.
- Ötən il Monako mərhələsində Şarl poulu qazansa da, maşını qırmaqla real qələbə şansını əldən verdi.
- Düzdü, ancaq təsnifat mərhələsindəki qəza ümumi mənzərəni o qədər də dəyişmir. Ferstappen ona görə səhv edir ki, çox aqressiv mübarizə aparır. Güman edirəm ki, ötən il uzun müddət insidentlərdən qaçan Hemilton sonradan düşündü ki, “kifayətdi, qəza istəyirsənsə, onu alacaqsan”. Təəssüf ki, Lüis çempion ola bilmədi, o bu qələbəni haqq edirdi. Amma britaniyalının karyerasını bitirməsinin vaxtıdı.
- Kimin? Hemiltonun?
- Bəli! Ona görə ki, bu il çətin nəyəsə nail ola. Lüis möhkəm oğlandı, ancaq onu da nəticələr məyus edir. Axı ən yaxşı maşını sürməyə öyrəşmişdi.
- “Mersedes”in geriliyi aradan qaldırmaq şansı varmı?
- Bilmirəm. Onların tərəqqiyə nail olmaq üçün hər şeyi var – həm resurslar, həm infrastruktur. Ancaq indi nəzərə almaq lazımdı ki, bizim vaxtımızdakından fərqli komandaların büdcəsinə məhdudiyyət qoyulub. Yeri gəlmişkən, şəxsən mən “Mersedes”in çətinliklərlə üzləşməsinin əleyhinə deyiləm, ona görə ki, bu marka məni cəlb etmir. Bununla belə, hesab edirəm ki, Hemilton əsl qəhrəmandı. O və Toto Volff superulduzdu.
- Bəs Lekler haqda nə deyərdiz?
- Şarl çox ağıllı və yetkin adamdı, əsl şəxsiyyətdi. Mənə elə gəlir ki, Ferstappen bu planda ona çatmır. Ancaq Mask böyük istedada malikdi.
- Leklerə Hemiltonla müqayisədə Ferstappenlə titul uğrunda mübarizə aparmaq daha asan olacaq?
- Hər ikisi səviyyəli pilotdu, onları məğlub etmək asan deyil. Hemilton, ümumiyyətlə, müstəsna şəxsdi, hərçənd mənə elə gəlir ki, o sürətdə Ferstappenə uduzur. Maks mənə Mihael Şumaheri xatırladır. O da alman kimi qeyri-adi dərəcədə sürətli olmağı bacarır.
- Necə hesab edirsiz, “Ferrari” yeni qələbə tsiklinin astanasındadımı?
- Belə nəticələr çıxarmaq üçün hədsiz tezdi. Axı mərhələlər ötdükcə mübarizə qızışır. “Ferrari” “Red Bull”, Maks Ferstappen, Edrian Nyui ilə savaşmalı olacaq. Bu mübarizə uzun çəkəcək.
ORXAN hazırladı