"Avrokubokda yeganə təmsilçimizin mərhələ adlaya bilməməsi üzücüdü. Keçiləsi rəqib idi. Bakıdakı matçda, əsasən də ikinci hissədə onları öz qapılarına doğru sıxışdıraraq üstün oyun sərgiləyib məğlub etdik. Cavab oyunun ilk hissəsini də aktivimizə yazmaq olar. Düşünürəm ki, "Qarabağ"ın qol və qollar vura bilməməsinin və mərhələ keçə bilməməsinin əsas səbəbi başda Kadi olmaqla Ovusu, Vaci kimi aparıcı oyunçuların komandanı tərk etməsidi. Bu futbolçuların hər biri həm oyunun gedişində, həm də sonradan meydana çıxmaqla matça təsir edə bilirdi. Onların gedişi Ağdam təmsilçisi üçün böyük itkidi. Yeni transferlər Benzya, Diakabi və Cicanın lazımi formaya düşməsi zaman alacaq. Yankoviç, Şahruddin və Medinanın yoxluğu da təsirini göstərdi. Bundan başqa, Zubirlə Şeydayev ümidləri doğrulda bilmədi. Söz yox ki, hər bir futbolçunun oyununda eniş, durğunluq olur. Bu futbolun bir parçasıdı. Amma son matçlarda onların, əsasən də Ramilin oyununda eniş var. Düzdü, "Sabah"dan "Qarabağ"a keçəndən sonra daha yaxşı formaya düşməyə başladı. Bu mövsüm də 15 qolla bombardirlər yarışında ikincidi. Heç kim inkar edə bilməz ki, milli üzvü komandası üçün döyüşmür. Əsla! Sadəcə, qaçmasına, can qoymasına rəğmən, son nöqtəni qoya bilmir. Düşünürəm ki, Qurban müəllim bunları bizdən daha yaxşı bilir və futbolçusuna təsir göstərəcək. Biz də yenidən Ramilin parlaq oyunlarını görəcəyik".