“Əslində “Zirə”nin böyükhesablı qələbəsində oyunu və qurduğu strategiya rol oynadı. “Torpedo”da Avropanın ən yaxşı komandalarından biri deyil. Bunu da başa düşmək lazımdı. İstənilən halda heyətində texnikalı oyunçular var idi. “Zirə” buna hazır olmasaydı, “Torpedo” onu əks-hücumlarda yaxalaya bilərdi. Həm futbolçular, həm də məşqçilər heyəti bunu öncədən düşünmüşdülər ki, biz daha çox dominant oynayacağıq. Top bizdə olacaq, amma itirəcəyimiz halda rəqib çətinlik yarada bilər. Bu səbəbdən buna hazırlıqlı olmaq lazımdı. Digər tərəfdən, “Torpedo”nun zəif nöqtələrini yaxşı təhlil etmişdilər. Rəqib müdafiəçilər oyun qurarkən kifayət qədər top itkisinə yol verirdi. “Zirə” də bu fürsətdən istifadə edə bildi. Rəqibi təzyiq altında saxlayıb, qollar vurmağı bacardılar. Avrokuboklarda oynamaq “Zirə”nin planında yox idi. Bir çox oyunçularını istirahətə göndərməsi, transfer bazarında əsasən daxili çempionatı düşünərək hərəkət etməsi “qartallar”ın oyununa təsir edəcək amillər idi. Bu matçı belə qısa müddətdə hazırlıq görən “Zirə”nin ən yaxşı çıxışı hesab etmək olmaz. Daha effektli, daha güclü oynaya bilərlər. Belə qısa müddətdə maksimum səviyyədə hazırlaşmağı bacarıblar. Nə mümkündüsə, öhdəsindən gəldilər. Hesabın 3:0 olması son dəqiqələrdə futbolçuların rahatlamasına səbəb oldu. Məncə, bu rahatlıq hazırlıqsız olmaqdan yox, böyük hesabdan irəli gəlirdi.
“Zirə”nin “Torpedo” zəif olduğu üçün belə böyükhesablı qələbə qazandığını demək düzgün deyil. Burda bir çox amillər rol oynadı. “Zirə” rəqiblə müqayisədə daha çox komplektləşmişdi, ortaya yaxşı oyun üslubu ortaya qoydu, üstün strategiya seçdi. Bu amillərdən əlavə oyunçu keyfiyyətində də rəqibi üstələməyi bacardılar. Hesab edirəm ki, “Zirə” haqlı qələbə qazandı. Digər tərəfdən, Gürcüstan çempionatı bizim yerli liqadan geri qalsa da, “Torpedo”ya oynamaq imkanı versəydik, rəqibin hücumlarının qarşısını almasaydıq, bizə yetərincə qol vura bilərdi. Gürcüstan təmsilçisinin zəif görünməsinin bir səbəbi də onlara qarşı doğru strategiyanin seçilməsi idi. Bu qədər bəsit.
Məşqçi təklikdə heç nə demək deyil. Onun strategiyalarını meydanda həyata keçirən futbolçulardı. Onları bir yerə toplayan, strategiya quran adam lazımdı. Bu da məşqçinin vəzifəsidi. Məncə, bu qələbənin memarı həm futbolçular, həm də məşqçidi. Təkcə Rəşad Sadıqovu nəzərdə tutmuram. O və məşqçilər heyəti. Müəyyən məqamlarda, fiziki baxımdan, oyunçuların hazırlığı baxımından Rəşad Sadıqovun rolu böyükdü, amma texniki heyəti unutmaq lazım deyil. Nəticə etibarilə oyun planı, futbolçulara fərdi hazırlıq keçilməsi, qapıçı məşqçisi ilə ortaya keyfiyyət qoya bilirsən. Ya texniki heyətdən, ya da futbolçulardan biri hardasa axsayırsa, sonda istəyirsən ən yaxşı məşqçi ol, mərkəz müdafiəçinin səhvindən qol vurulursa, ediləcək bir şey qalmır”.