“Sona qədər gərgin oyun izlədik. Hər iki komanda azarkeşlərin zövqünü oxşayan performans sərgilədi. Birinci hissədə “Gent” daha üstün idi. Bəlkə də “Qarabağ” Belçika təmsilçisinin dərhal yüksək pressinq edəcəyini gözləmirdi. İlk hissənin sonuna yaxın Zubirlə Şeydayevin texniki bacarığı, təkbətək mübarizələrdə topu itirməməsi rəqibi geri çəkilməyə məcbur etdi. Fasilədən sonra isə nəzarəti ələ ala bildik. Bunun məntiqi nəticəsi kimi qazandığımız penaltidən Şeydayev, təəssüf ki, yararlana bilmədi. Amma “Qarabağ” geri çəkilmədi, sürətli keçidlərin və hücum cəhdlərinin intensivliyi qolla nəticələndi. “Gent”in oyunçuları həddən artıq səhvə yol verdi. “Qarabağ”, adətən, belə səhvləri bağışlamır. Belçikalıların ikinci hissədəki performansına əsasən deyə bilərəm ki, ikinci qolu da vura bilərdik. Səfər oyununun isə Bakıdakı qarşılaşmaya nisbətən daha asan olacağını düşünürəm. Baxmayaraq ki, “Gent” evdə daha cəsarətli oynayacaq. Artıq Qurban Qurbanov da rəqibin üslubuna tam bələddi. Futbolçularımız onların zəif nöqtələrindən məharətlə istifadə edəcək. Amma Ağdam təmsilçisinin indiki durumu müqayisədə yaxşı deyil. Komanda Kadi və Ovusu heyətdə olarkən daha fərqli oyun nümayiş etdirirdi. Düzdü, transferlər var. Lakin onlar tam uyğunlaşmayıb. Bu problem tədricən yoluna qoyulacaq və daha güclü komanda görəcəyik”.