Azərbaycan klubları üçün avrokuboklarda 1-ci təsnifat mərhələsinin ilk oyunları geridə qaldı. Çempionlar Liqasında “Sabah” “Nyu Seynts”i 2:0, Avropa Liqasında “Qarabağ” “Vestri”ni, Konfrans Liqasında “Zirə” “Torpedo”nu 3:0 hesabıyla məğlub etdi.

Hesablardan göründüyü kimi, komandalarımız həm qol buraxmadı, həm də növbəti mərhələyə yüksəlmək şansını xeyli artırdı. Xüsusən “köhlən atlar”la “qartallar”ın artıq ilk səddi aşdığını düşünə bilərik. Uğurlar həm də Azərbaycanın UEFA reytinqində xal hesabını 0,750 əmsal artırdı və 19,312 əmsala çatdırdı. Ümumiyyətlə, bu oyunlardan sonra ən çox əmsal toplayan ölkə bizik!

Ancaq uğurlu nəticələr bununla yekunlaşmır. Belə ki, hər üç klub rəqibini bir çox statistikada əzici üstünlüklə qabaqladı. Əvvəlcə hər üç matçın əsas rəqəmlərinə nəzər salaq.

Sabah – Nyu Seynts
14 (2) qapıya (“çərçivə”yə) zərbə 5 (1)
11 künc zərbəsi 2
2 ofsayd 0
8 qayda pozuntusu 5
75 topa sahibolma (faizlə) 25

Qarabağ – Vestri
14 (5) qapıya ("çərçivə"yə) zərbə 0
9 künc zərbəsi 0
4 ofsayd 2
4 qayda pozuntusu 6
72 topa sahibolma (faizlə) 28

Zirə – Torpedo
14 (10) qapıya (“çərçivə”yə) zərbə 2 (1)
9 künc zərbəsi 3
3 ofsayd 0
15 qayda pozuntusu 13
54 topa sahibolma (faizlə) 46

İndi isə ümumi əsas statitistikaları toplayaq və nəticəyə baxaq.

42 (17) qapıya (“çərçivə”yə zərbə) 7 (2)
29 künc zərbəsi 5
9 ofsayd 2
27 qayda pozuntusu 24
201 topa sahibolma (faizlə) 99

Göründüyü kimi, komandalarımız intizam məsələlərində bir qədər çətinliklə üzləşsə də, bütün oyunlarda hadisələrin axarına nəzarət edib, loru dildə desək, rəqiblərə gün verib, işıq verməyib. Ümid edək ki, cavab oyunları yuxarıdakı statistikaların əleyhimizə dəyişməsiylə nəticələnməyək. Ən əsası, pis sürpriz qeydə alınmayacaq. Sükanı belə saxlayın!

KƏNAN BAHADIR