''Lill'' daha bir türkiyəli futbolçu transfer etdi

Fransanın iddialı klublarından olan ''Lill'' daha bir türkiyəli futbolçunu heyətinə qatıb.

''Şimallı itlər'' ''Neymegen''in üzvü Başar Önalı transfer edib. Bu transfer fransızlara 12,5 milyon avroya başa gəlib və istedadlı futbolçu ilə dördillik müqavilə imzalanıb. Müqavilədə maksimum 2 milyon avroluq bonuslar da mövcuddu.

Niderlandda doğulan 22 yaşlı qürbətçi futbolçu ''Qraafshap''ın yetirməsidi və peşəkar karyerasına da bu klubda start verib. ''Neymegen''in şərəfini isə 2024-dən qoruyurdu. O, Türkiyənin aşağı yaş qruplarından ibarət yığma komandalarında ümumilikdə 17 oyun keçirib və 4 qol vurub. Əsasən sol vinger mövqeyində çıxış edən Başar Önal ''Neymegen''də forma geydiyi 70 rəsmi oyunda aktivinə 10 qol, 12 məhsuldar ötürmə yazıb.

Qeyd edək ki, ''Lill''də hazırda türkiyəli qapıçı Berke Özər də çıxış edir. Bu klubun sonuncu dəfə çempion olduğu 2021-ci ildə isə heyətdə Burak Yılmaz, Yusuf Yazıcı və Zəki Çəlik kimi türkiyəli ulduzlar var idi.