“Qarabağ” Duranın növbəti satışından da pay alacaq? – klub rəsmisinin cavabı

“Qarabağ”ın yola Kamilo Duransız davam edəcəyi dəqiqləşdi. Ağdamlıların heyətində Çempionlar Liqasının əsas mərhələsində xarüqələr yaradan kolumbiyalı bundan sonra “Seltik”in şərəfini qoruyacaq.

Şotlandiya mənbələrinin iddiasına görə, “köhlən atlar” bu satışdan əsas və bonus ödəmələrlə birgə nə az, nə çox - 6 milyon funt sterlinq qazanacaq. Bunun Azərbaycan futbol tarixinin ən bahalı keçidi olduğundan xəbərdarsız. Həmin məbləğ “Seltik” üçün də itki sayılmaya bilər. Heç şübhəsiz, işlər yolunda getsə, şotlandlar 5 illik müqavilə imzaladığı futbolçunun satışından daha çox vəsait əldə edəcək.

Maraqlıdı, bəs, “Qarabağ” Duranın növbəti kluba satışından pay ala biləcəkmi? Bu sualla ağdamlıların Marketinq və Kommunikasiya Departamentinin rəhbəri Anar Hacıyevə müraciət etdik. Ancaq klub rəsmisi bunun konfidensial məsələ olduğunu bildirərək, məlumatı açıqlamaq istəmədi.

Xatırladaq ki, Duran ötən ilin yayından “köhlən atlar”ın şərəfini qoruyurdu. Futbolçu bu müddət ərzində 45 oyunda 15 qol vurub.

KƏNAN BAHADIR