DÇ-2026-da ilk yarımfinal cütü bəlli oldu. Daha öncə Mərakeşi məğlub edən Fransa ilk yarımfinalçı olmuşdu.

Fransızların rəqibi İspaniya ilə Belçikanın duelində müəyyənləşdi. Fabian Ruisin 30-cu dəqiqədə vurduğu qola 41-ci dəqiqədə Şarl De Ketelare cavab verdi. Bu, İspaniyanın bu mundialda buraxdığı ilk qol oldu. Ümumilikdə İspaniyanın qol buraxmama seriyası 649-cu dəqiqədə qırıldı və bu, yeni rekord kimi DÇ-nin tarixinə düşdü.

İkinci hissənin ortalarında matçın taleyinə təsir edən olay yaşandı. Təcrübəli Tibo Kurtua zədə aldığı üçün əvəzləndi. Onun yerinə meydana çıxan ''Mançester Yunayted''li Senne Lammens çox keçmədən səhvə yol verərək topu uğursuz şəkildə qaytardı. Təcrübəsiz qapıçının qaytardığı topu Mikel Merino tora göndərərək İspaniyaya 2:1 hesablı qələbə qazandırdı.

Merino bundan əvvəlki mərhələdə Portuqaliya ilə oyunda da sonradan meydana çıxaraq komandasına minimal hesablı qələbə qazandırmışdı. ''Arsenal''ın üzvü bununla da DÇ tarixində ardıcıl iki pley-off oyununda sonradan meydana çıxaraq qələbə qolunun müəllifi olan ilk futbolçu oldu! Lammens isə son 52 ildə sonradan meydana çıxdığı qarşılaşmada qolla nəticələnən səhvə yol verən ilk qapıçı oldu. DÇ-1974-də Zairin qapıçısı Ndimbi Tubilandu Yuqoslaviya ilə oyunda sonradan meydana çıxaraq səhvə yol vermişdi.

Beləliklə, İspaniya bu maneəni də dəf edərək yarımfinalda Fransanın rəqibi oldu. İspaniyanın çalışdırıcısı Luis de la Fuente böyük turnirlərdə (AÇ və DÇ) ilk 13 oyunda uduzmayan birinci məşqçi kimi tarixə düşdü (12 qələbə, 1 heç-heçə).