Avrokuboklara qatılan klublar ilk üç oyunda qələbə qazandı. İyulun 7-də “Sabah” Çempionlar Liqasında rəqibə top vermədi, ertəsi “Zirə” böyükhesablı qələbə qazandı, dünən isə “Qarabağ” 3 cavabsız qol vurdu. Klublarımızın ilk oyunları ilə bağlı təcrübəli mütəxəssis Ağasəlim Mircavadovun fikrini öyrəndik: “Sabah” çempion olan heyəti saxlayaraq bir neçə yeni oyunçunu sıralarına qatıb. Deyərdim ki, “Sabah”ın oyununda problem olmadı. Sadəcə, az top vurdular. Böyük üstünlükləri var idi. Avrokuboklarda çıxış edirsənsə, yüngül problemlər ola bilər. Oyunlar arasında bir həftə vaxt var. Hansısa oyunçunun çətinlik çekdiyi məqam varsa, onu düzəldə bilər. Məncə, “Sabah” səfərdə də uğurlu olacaq. Komandamız əks-hücumlarda yaxşı çıxış edir. Mən inanıram ki, futbolçular fiziki keyfiyyətlərini daha da artıracaq. Adətən, belə situasiyalarda oyun yox, nəticə vacib olur. O olarsa, daha rahat məşq etmək, motivasiyada yüksəliş mümkündü. “Zirə” digər komandalarımızdan daha az yoxlama görüşü keçirib. “Turan Tovuz”la bağlı məlum hadisədən sonra “qartallar” hazırlıq prosesini dəyişib. Qısa müddətdə toplandılar. Əsas planları yerli liqaya hazırlıqdan ibarət idi. Lakin bu məsələnin öhdəsindən gəlməyi bacardılar. “Zirə” yeni oyunçularla daha da güclənməlidi. Ümumilikdə inamlı çıxış etdi və nəticə qazandı. “Qarabağ” heyətinə yeni qatdığı futbolçulara şans verdi. Daha çox qol vura bilərdi. Oyunçuların sistemə öyrəşməsi üçün daha çox matça ehtiyacları var. Onlar qısa müddətdə hazır vəziyyətdə olacaqlar. Oyunçuların fərdi keyfiyyətləri ilə bağlı bağlı nəsə demək üçün zamana ehtiyac var. “Qarabağ”ın yeni aldığı futbolçular heç də ucuz deyil. Avropada oynamaq bu komanda üçün tramplindi. Onların əsas məqsədi də avrokuboklarda uğur qazanmaqdı.

Mən istərdim ki, dörd klubumuz qruplara vəsiqə qazansın. “Neftçi”nin də növbəti mərhələdə uğur qazanmasını gözləyirəm.

Komandaların oyun üslubuna gəlincə, bu barədə hələ nəsə demək olmaz. Həftədə bir matç oynayırsan, yorğunluq az olur. Çempionat başlayandan sonra da bu nəticələr davamlı olmalıdı. Bu yöndə klublar da addım atmalıdı”.

İSRAYIL XEYRULLAYEV