Fevralın 16-da Avropa Liqasının (AL) pley-offuna start verildi.

İlk oyunlar çərçivəsində 8 duel keçirildi. 4 matçın heç-heçə başa çatdığı ilk görüşlərdə yalnız bir komanda səfərdə qələbəyə nail oldu.

Xatırladaq ki, qitənin “ikinci dərəcəli” klub turnirində qrup mərhələsində 1-ci yeri tutan komandalar birbaşa 1/8 finalda oynamaq hüququ qazanıb. Qrup ikinciləri bu mərhələyə vəsiqə uğrunda Çempionlar Liqasının (ÇL) qruplarını 3-cü yerdə başa vuran komandalarla pley-off oyunları keçirirlər. AL-in qruplarını 3-cü yerdə bitirənlər isə Konfrans Liqasının (KL) pley-offunda oynamaq hüququ qazanıblar.

Sözsüz, cümə axşamı əsas diqqət “Nou Kamp”dakı matça yönəlmişdi. ÇL-in qrupunu 3-cü yerdə başa vurduğu üçün AL-ə istiqamətlənən “Barselona” doğma arenasında “Mançester Yunayted”lə qarşılaşdı. Ümumilikdə bərabər səviyyədə keçən mübarizədə 4 qol qeydə alındı ki, qapı torları yalnız fasilədən sonra silkələndi. İlk yarı ilə müqayisədə 2-ci hissə yetərincə açıq futbolla yadda qaldı. Turnirin finalına layiq oyunda hər iki tərəfin sonda qələbə qazanmaq şansları oldu. Lakin ilk görüş 2:2 hesabıyla nəticələndi və Avropa nəhəngləri arasındakı rəqabətin qalibi gələn həftə İngiltərədə müəyyənləşəcək.

“Barselona” artıq bütün turnirlərdə 17 oyundu uduzmur. Xavi Ernnadesin komandası ötən il oktyabrın 26-da ÇL-in “Bavariya” ilə keçirilən ev oyunundan (0:3) sonra 15 qələbə qazanıb və rəqibləri ilə 2 dəfə heç-heçə edib. Amma MY kataloniyalıların bütün turnirlərdəki 11 oyunluq qələbə seriyasını qırdı. Albanın “Barselona”da 450-ci oyununu keçirdiyini və Reşfordun bu mövsüm klubunda 22-ci qolunu vurduğunu da bildirək. 25 yaşlı hücumçu bununla da 2019/20 mövsümündə müəyyənləşdirdiyi şəxsi rekordunu təkrarladı.
Avropanın 5 aparıcı liqasının təmsilçiləri daha iki oyunda qarşılaşdılar. “Yuventus” qrup mərhələsində “Qarabağ”ı üstələyərək 2-ci yeri tutan “Nant”ı İtaliyada məğlub edə bilmədi – 1:1. Turin klubu cari avrokubok mövsümündə keçirdiyi 7 matçın yalnız birində qələbə qazanıb. “Bayer-04” isə Almaniyadakı oyunun son dəqiqələrində buraxdığı qolla “Monako”ya 2:3 hesabıyla məğlub oldu.

İlk oyunlardan sonra yalnız PSV-nin qapısından 3 cavabsız top keçirən “Sevilya”nın növbəti mərhələnin püşkünü gözləyə biləcəyini əminliklə iddia etmək mümkündü. Postsovet məkanını AL-də təmsil edən yeganə komanda pley-offa müsbət nəticə ilə başladı. “Şaxtyor” məlum səbəbdən Polşanın Varşava şəhərində keçirilən oyunda “Renn”ə qalib gəldi - 2:1.

pley-off, ilk oyunlar

Barselona (İspaniya) – Mançester Yunayted (İngiltərə) 2:2
Alonso, 50. Rafinya, 76 – Reşford, 53. Kunde, 69-öz qapısına.
Yuventus (İtaliya) – Nant (Fransa) 1:1
Vlahoviç, 13 – Blas, 60.
Bayer-04 (Almaniya) – Monako (Fransa) 2:3
Diabi, 48. Virts, 59 - Qradetski, 9-öz qapısına. Diatta, 74. Disasi, 90+2.
Şaxtyor (Ukrayna) – Renn (Fransa) 2:1
Krıskiv, 11. Bondarenko, 45+1-p. – Toko Ekambi, 59.
Ayaks (Niderland) – Union (Almaniya) 0:0
Zaltsburq (Avstriya) – Roma (İtaliya) 1:0
Kapaldo, 88.
Sevilya (İspaniya) – PSV (Niderland) 3:0
Ən-Nəsiri, 45+2. Okampos, 50. Qudel, 55.
Sportinq (Portuqaliya) – Midtüllann (Danimarka) 1:1
Koates, 90+4 – Aşur, 77.
Cavab oyunları fevralın 23-də keçiriləcək.
Bombardirlər: Reşford (Mançester Yunayted), V.Oliveyra (Braqa), S.Ximenes (Feyenoord) - 4.

Oyundan sonra

Xavi Ernandes, “Barselona”nın baş məşqçisi: “Bərabər səviyyəli iki komandanın oyununun şahidi olduq. Çox zəhmətsevər, fiziki cəhətdən güclü və necə mübarizə aparmalı olduğunu bilən rəqibə qarşı oynadıq. Amma biz də yaxşı təsir bağışladıq. Məndə son dəqiqələrdə qələbə qolunu vura biləcəyimizlə bağlı hiss oyanmışdı. Hər şeyə “Old Trafford”da aydınlıq gələcək. Ora növbəti mərhələyə vəsiqə qazanmaq hədəfi ilə yollanacağıq. “Mançester Yunayted”lə matçda təzyiq altında olursuz, rəqib əksər duellərdən qalib çıxır. Hərdən topu irəli aparmaqda çox çətinlik çəkirdik, amma ümumilikdə güclü rəqibə qarşı yaxşı oynadıq. Həmçinin topu itirəndən sonra güclü pressinq etdik, amma “Yunayted” doğru qərarlar verə bilən əla oyunçulara malikdi. Ten Haqın fikirlərinə hörmət edirəm, amma komandamızın da kifayət qədər təhlükəli vəziyyət yaratdığını düşünürəm. Biz də daha çox qol vura bilərdik. Müdafiədə yaxşı oynadıq. Fredin əllə oynamasına görə penalti verilməliydi. Bu, gün kimi aydın idi. Bunu necə etməmək olar? Çempionlar Liqasının Milandakı oyununda penaltimiz verilmədi, bu gün də eyni qərarla üzləşdik”.

Erik ten Haq, “Mançester Yunayted”in baş məşqçisi: “Düşünürəm ki, meydanda yüksək səviyyədə oynayan iki yaxşı komanda var idi. Hər kəs rəqiblərin həqiqətən də yüksək səviyyəli oyun nümayiş etdirməsi ilə razılaşar. Belə güclü komandaya qarşı oyunumuz məni tam qane etdi. Hücumun son mərhələsində daha yaxşı çıxış edə bilərdik. İspaniya çempionatının lideri ilə oyunda çoxlu qol vəziyyəti yaratdıq. Daha çox qol vura bilmədiyimiz üçün bir az məyusuq. Ən azı 4 qol vura bilərdik. Hakimliyin matça böyük təsiri oldu. Reşforda qarşı aşkar kobudluq edildi. Buna görə penalti verməyən hakimlər belə səhvə yol verməməliydilər”.

Markus Reşford, “Mançester Yunayted”in hücumçusu: “Bu heç-heçə bizim üçün məğlubiyyətə bənzəyir. Doğrudu, ilk yarı ev sahiblərinin üstünlüyü şəraitində keçdi. Amma sakitliyimizi itirmədik və imkan düşəndə şanslardan yararlanmağa çalışdıq. Komandamız iki baxımlı qol vurdu, nəticəyə nəzarət etməyə çalışdıq. “Barselona”nın kifayət qədər əla oyunçuları var, onlara topa sahibolma üzrə vaxt versən, meydanda boş zonalar tapmağa nail olurlar. Bir həftə sonra daha bir baxımlı oyunun olacağına və irəli addım atacağımıza ümid edirəm”.

Fakt

“Nou Kamp”da keçirilən “Barselona” – “Mançester Yunayted” matçını 90225 tamaşaçı izlədi. Bununla da AL-də yeni tamaşaçı rekordu müəyyənləşdi. Əvvəlki rekord 2017-ci il fevralın 23-də 1/16 final mərhələsinin “Tottenhem” – “Gent” matçının keçirildiyi Londondakı “Uembli” stadionunda (80465) qeydə alınmışdı.