Türkiyədə futbol mövsümünün başa çatması ilə növbəti ''futbol ili''ndə ölkəni avrokuboklarda təmsil edəcək bütün klubların adına aydınlıq gəldi.

Qeyd edək ki, qardaş ölkə 2022/23-də sonuncu dəfə avrokuboklarda 5 komanda ilə təmsil olunacaq. Türkiyə bu mövsüm əmsallar cədvəlində çox zəif nəticə göstərdiyi və 20-ci pilləni tutduğu üçün 2023/24-də Avropada yalnız 4 komanda ilə təmsil olunacaq!

Bu yay çempion ''Trabzonspor'' mübarizəyə ÇL-in təsnifatının pley-offundan başlayacaq. Komanda mərhələni adlayacağı təqdirdə tarixində ikinci dəfə ÇL-in qrupunda oynayacaq. Uğursuzluq təqdirində isə Abdulla Avcının kollektivi AL-in qrupunda oynamaq haqqı qazanacaq. ÇL-in qrupunda sonuncu dəfə 2008/09-da oynayan ''Fənərbaxça'' mövsümü ikinci pillədə tamamlamaqla uzun illər sonra yenidən Avropanın bir nömrəli turnirində iştirak hüququ qazanıb. İstanbul nəhəngi mübarizəyə 2-ci təsnifat mərhələsindən başlayacaq. Yəni komanda qrupa düşmək üçün üç rəqibi keçməli olacaq. ''Fənər'' dərhal uğursuzluqla üzləşib ilk rəqibini keçə bilməsə, mübarizəyə AL-in 3-cü təsnifat mərhələsində davam edəcək. Amma komanda ÇL-in təsnifatında heç olmasa, bir mərhələ adlaya bilsə, avtomatik ən azı AL-in qrup mərhələsini özü üçün təmin etmiş olacaq!

Ölkə kubokuna sahib çıxan ''Sivasspor'' ardıcıl 3-cü mövsüm avrokuboklarda oynamaq haqqı qazanıb. Komanda mübarizəyə AL-in təsnifatının pley-offundan başlayacaq. Yəni Rza Çalımbayın kollektivi bir rəqibi keçsə, AL-in qrupunda oynayacaq. Uğursuzluq təqdirində isə ''yiğidolar'' Konfrans Liqasının qrup mərhələsində oynayacaqlar. Mövsümü uyğun olaraq 3 və 4-cü pillədə tamamlayan ''Konyaspor''la ''İstanbul BŞ'' KL-də oynayacaq. Hər iki komanda bu turnirdə mübarizəyə 2-ci təsnifat mərhələsindən start verəcək. Avropanın 3-cü dərəcəli bu turnirində artıq məğlub olan tərəf mübarizəni dayandıracağından həm ''Konyaspor'', həm də ''İstanbul BŞ'' qrupa vəsiqə qazanmaq üçün üç rəqibi keçmək məcburiyyətindədi.