UEFA Millətlər Liqası, Avropa və dünya çempionatlarının seçmə mərhələsinin formatını dəyişib. Qərar qurumun İcraiyyə Komitəsinin iclasında qəbul olunub.

2024-cü ildən tətbiq ediləcək yeniliyə əsasən, Millətlər Liqasında "dördlər finalı"ndan öncə pley-off oyunları keçiriləcək. A liqasında qrup birinciləri ilə ikinci yeri tutan komandalar ev və səfərdə olmaqla 1/4 final matçları keçirəcək və qaliblər "dördlər finalı"na vəsiqə əldə edəcək. Bundan başqa, A liqasında üçüncü yeri tutanlar B liqasının ikinciləri, B liqasında üçüncü olanlar isə C liqasının ikinciləri ilə aşağı diviziona düşməmək və ya əksinə, yuxarı qalxmaq uğrunda pley-off matçları oynayacaq.

Seçmə mərhələlərdə qrupların sayı artırılacaq. Ölkələr hərəsində 4 və ya 5 komanda olmaqla 12 qrupa bölünəcək. Qrup qalibləri Avropa və ya dünya çempionatlarına birbaşa vəsiqə qazanacaq. İkinci yeri tutan yığmalar isə nüfuzlu turnirlərə ya birbaşa, ya da pley-off matçlarından sonra yollanmaq hüququ əldə edəcək. UEFA 2024-cü ildə keçiriləcək Avropa çempionatında komanda sayının artırılmayacağını açıqlayıb. Yeni format 2024-dən sonra tətbiq olunacaq. UEFA İcraiyyə Komitəsinin növbəti iclası 2023-cü il aprelin 4-də - UEFA-nın 47-ci Ali Konqresindən bir gün əvvəl Portuqaliyanın paytaxtı Lissabonda keçiriləcək.
Növbəti ildən tətbiq olunacaq yeniliklə bağlı yığmanın məşqçisi Arif Əsədovun fikirlərini öyrənməyi lazım bildik. Arif bəy qitə futbol qumunun yeniliyinin bizim kimi yığmalar üçün əlavə şans olduğunu söylədi: “Yeni formatın tətbiqi bizim kimi yığmalara şans yaradır və əlavə stimul verir. Ancaq bu imkandan nə dərəcədə yararlana biləcəyimizi zaman göstərəcək. Bizim yığma səviyyəsində olan komandalara seçmə mərhələlərdə qrupdan çıxmaq çətin olur. Güclü qruplara düşdüyümüzdən irəli getmək mümkün olmur. Necə ki, Avropa çempionatının seçmə mərhələsində ağır qrupda mübarizə aparacağıq. Özünüz də bilirsiz ki, qitənin sayılıb-seçilən milliləri ilə eyni qrupda yer almışıq. Yeni format isə bizə əlavə imkan yaradır”.
RƏŞAD