“Mən hətta hesab etmirəm ki, həqiqətən də Çempionlar Liqasını qazanmışam”

Birdən yadınızdan çıxar a, Eden Azar hələ də “Real”da çıxış edir. Ancaq necə oynayır? Belçikalı bu mövsüm cəmi 296 dəqiqə yaşıl meydanda olub. Və statistikanı yaxşılaşdırmağa da halı yoxdu – yenidən zədələnib, bu dəfə dizindən. Eden Madriddə keçirdiyi 4 ildə 18-ci dəfə sıradan çıxıb.

İspaniya mətbuatının yazdığına görə, belçikalı iki həftə “dincəlməli olacaq”.

4 il ərzində 74 oyun buraxıb

• Azar “Real”da olduğu 4 il ərzində müxtəlif zədələr üzündən 74 oyun buraxıb. Bu müddərdə Çempionlar Liqasını, iki çempionluq, həmçinin İspaniya və Avropa Superkubokunu qazanıb.

• “Çelsi”də 7 il ərzində 21 oyun buraxmışdı.

• “Real”da Azarın qeyri-peşəkarlığına və daimi zədələrinə görə çox məyusdular. Eden məşqlərdə canına cəfa vermir, yalnız yay toplanışlarında çalışır. Karlo Ançelotti isə bu durumu sakit şəkildə anladır: “Azar niyə oynamır? Hər şey sadədi – ona görə ki, başqaları oynayır. Mən burda oyunları qazanmaq üçün çalışıram, daha futbolçulara oyun vaxtı vermək üçün yox”.

• Azar Madriddə ilə 30 milyon avrodan çox qazanır – məsələn, Vinisiusla Rodriqonun birgə qazancı bu məbləğə çatmır. Komandanı liderlərindən Militao isə qazanc baxımından belçikalıdan 5 dəfə geri qalır. Predraq Miyatoviç deyir ki, “Azarın ətrafında başverənləri heç kim gözləmirdi. Onun haqqında danışmaq praktiki cəhətdən sabiq futbolçu haqda danışmaq kimidi”.

Edeni “Əl-Nəssr”ə sırımağa çalışırlar

Aydın məsələdi ki, “Real” Azardan qurtulmaq istəyir, ancaq zədəyəmeyilli vingerə yaxın durmaq istəyən yoxdu. İlin əvvəlindən bəri “Əl-Nəssr” haqda danışırlar. Ümumiyyətlə, Kriştiano Ronaldo klubla müqavilə bağlayandan sonra media çoxlarını ora göndərir. Ancaq Edenin ətrafında xüsusi səs-küy qalxıb. Düzdü, “Əl-Nəssr”in yeni ulduzlar, o cümlədən Azarı da almaq fikrində olmadığını iddia edən qaynaqlar da var.

Görünür, Eden özü də yaxşı anlayır ki, artıq “Real”da özünü göstərməsi mümkün olmayacaq. Hətta Qətərdə keçirilən dünya çempionatından əvvəl verdiyi açıq müsahibədə fanatlardan üzr də istəmişdi:

"Yayda mənə getməli olduğumu desələr, qəbul edəcəm. Hələ birillik müqaviləm var. Bu artıq klubun qərarıdı. Əlbəttə, anlayıram ki, adamlar mənə şübhə edirlər. Bu normaldı. Üç il ərzində oynamamışam, deməli, ən qısa zaman kəsiklərində də yüksək səviyyə göstərməliyəm. Bağışlayın, ancaq çalışdığımı görmək mümkündü, sadəcə, vaxt bəs etmir. Aydın məsələdi ki, komandada məndən yaxşı oynayanlar var. Mən bu reallığı qəbul etməliyəm.

Öz transferimi 0 balla qiymətləndirərdim, ona görə ki, oyunumla lazımi səviyyəni nümayiş etdirmirəm. “Real”ın oyunçusu olmaq uşaqlıq arzum idi. Mən bu futbolkada oynamaq istəyirəm. Reallıqda hər şey fərqli oldu. Mən hətta hesab etmirəm ki, həqiqətən də Çempionlar Liqasını qazanmışam. Ancaq gülüşümü itirmirəm və problem yaratmıram. Dünyanın ən yaxşı komandasında futbol oynamaqda bəxtim gətirib".

İndi özünüz deyin: “Real”ı seçməkdə Azarın bəxti gətirib, ya yox?!

Orxan