Türkiyə yığmasının və ''Atalanta''nın mərkəz müdafiəçisi Merih Dəmiral bəlkə də Kriştiano Ronaldonun imzalı formasını yardım məqsədi ilə hərraca çıxararkən kampaniyaya marağın bu dərəcədə böyük olacağını təsəvvür etmirdi.

Amma son 1-2 gündə kampaniya böyük populyarlıq qazandı və demək olar dünyanın bir çox ünlü isimləri ora dəstək verdilər. 24 yaşlı futbolçu kampaniyanın birinci günündə Kriştiano Ronaldo, Leonardo Bonuççi və Paulo Dibalanın formalarının satışından ümumilikdə 5 milyon lirə əldə olunduğunu açıqladı.

Sonra Alvaro Morata ilə Antuan Qrizmann da kampaniyaya qoşuldu. Bunun ardından zəncirvari reaksiya kimi dəstək artmağa başladı. Erlinq Holann, Kevin De Bruyne, Harri Keyn, Neymar, Kilian Mbappe və Lionel Messi də imzalı formasını satışa çıxararaq kampaniyaya dəstək verdi.

Hərçənd türkiyəli futbolsevərlər sosial şəbəkələrdə Messidən daha ciddi dəstək gözlədiklərini qeyd ediblər.

Argentinalı superulduzun Türkiyə və Suriyada zəlzələdən əziyyət çəkənlər üçün 3,5 milyon avroluq maddi dəstək verməsi haqda yayılan xəbərlər isə daha çox feyk məlumata bənzəyir. Bununla bağlı heç bir rəsmi açıqlama və ya mənbə yoxdu.

Football-plus.az