Premyer-liqada avrokuboklara vəsiqəyə iddialılar sırasında olan, son turda hətta “Liverpul” kimi nəhəngi darmadağın edən “Brayton”da ab-hava qaydasında deyil.

Komandanın liderlərindən biri olan Leandro Trossard (cari mövsümdə 7 qol, 3 məhsuldar ötürmə) Roberto de Zerbi ilə mübahisə edib. Leandronun agentinin dediyinə görə, baş məşqçi artıq bir aydı yarımmüdafiəçi ilə danışmır.

De Zerbi Trossardın davranışına qəzəblənib
Trossard 2023-cü ildə hələ də “Brayton” formasında meydana çıxmayıb və “Lester”lə yanvarın 21-də keçiriləcək oyunu da buraxaq. İngiltərə mətbuatı yarımmüdafiəçinin əsas komandadan ayrı məşq etdiyini yazır. Leandro kiçik əzələ zədəsindən əziyyət çəkirdi, ancaq onu heyətdən De Zerbi şəxsən özü çıxarıb. Onun davranışı baş məşqçinin xoşuna gəlmir. İtaliyalı mütəxəssis futbolçunun “Midlsbro” ilə kubok oyunu ərəfəsində məşqi tərk etməsindən hədsiz narazıdı: “O, meydana çıxmayacağını anlayan kimi mənə bir kəlmə də demədən məşqdən ayrıldı. Bu heç də yaxşı hərəkət deyil”.
De Zerib həmçinin belçikalıdan daha artığını gözlədiyini deyib: “Düşünürəm ki, o hələ potensialının 80 faizini göstərir. Trossardda intensivlik və həvəs çatmır. O gözəl bilir ki, “Brayton”da oynamaq istəyirsə, çox qaçmalı, çox çalışmalı və düzgün formada olmalıdı. Ona görə ki, biz “Real” və ya “Barselona” kimi böyük komanda deyilik. “Brayton”uq və bizə başqaları ilə bərabər səviyyədə çalışan futbolçular lazımdı”. De Zerbi futbolçunu dinləməyə hazır olduğunu desə də, İngiltərədə bu münaqişə artıq hədəqədən çıxıb.

Agentin dediyinə görə, baş məşqçi çoxdan futbolçu ilə danışmır
Belçikalının agenti Komhair Coz italiyalı mütəxəssisin dediklərinə belə münasibət bildirib: “Məşq zamanı Leandro ilə komanda yoldaşı arasında boş bir məsələyə görə mübahisə yaranıb. Həmin vaxtdan bəri baş məşqçi Trossardla danışmır ki, bu da atmosferi, məhsuldarlığı yaxşılaşdırmağa xidmət etmir”.
Agentin dediyinə görə, yarımmüdafiəçiyə bildirilib ki, əsas komanda ilə birgə çalışa bilməz: “Dörd həftə ərzində futbolçu ilə birbaşa danışmayan baş məşqçinin mövqeyi mənim üçün anlaşılmazdı. Və o dəfələrlə deyib ki, transfer ən uğurlu qərar olardı”.

Görünür, Trossard həqiqətən də “Brayton”dan gedəcək: onun müqaviləsinin müddəti 2024-də bitir, klub isə sərfəli təklif alacağı təqdirdə belçikalını elə bu qış satmağın əleyhinə deyil. Agent sözlərinə bunu da əlavə edir: “Brayton” Leandronun Qətərdəki dünya çempionatına qatılması ərəfəsində onunla müqavilə müddətini uzatmağı planlaşdırırdı. Ancaq bu baş vermədi, tərəflər razılığa gələ bilmədi. Leandro artıq növbəti addımı atmağa hazır olduğunu deyib”.

De Zerbi isə mümkün transferlə bağlı danışmır: “Bu mənim problemim deyil. Mən yalnız məşqçiyəm”.

“Tottenhem” hələ ki Trossardın əsas müştərisidi. Ancaq Mudriki “Çelsi”yə “qapdıran” “Arsenal” da üfüqdə görünə bilər.
Potter Trossardla çalışmağı xoşlayırdı

Trossard artıq üç ildi “Brayton”dadı, “Genk”lə çempion olandan sonra 15 milyon funt müqabilində İngiltərəyə yollanıb. Qrehem Potterin dönəmində potensialını ən parlaq şəkildə açıb. Potter komandanı çalışdırarkən 10, 8 nömrə, “yalançı” hücumçu və lateral kimi oynayıb. Hazırda “Çelsi”ni çalışdıran mütəxəssis seçimini belə izah edirdi: “Az qala hər kəs deyir ki, Leandro mərkəz zonasına meyillənməyi sevir, yalnız orda təhlükəli vəziyyətlər yarada və qol vura bilər. Ancaq belədə biz ondan maksimumu ala bilmirdik. Mənə elə gəlir ki, sol cinahda daha geniş diapazonda keyfiyyətlərini göstərməyi bacarır”.

Çox güman, Potterin ardından Trossard da tezliklə “Brayton”u tərk edəcək. Və o da Londona gedəcək, ancaq şəhərin şimal hissəsinə.