Uzun müddətdi, tanınmış bir mərkəz hücumçusu almaq arzusunda olan, amma bu istəyinə heç cür çata bilməyən ''Fənərbaxça'' ilə bağlı yeni iddialar gəlməkdədi.

Seru Girassi, Endrik, Vangelis Pavlidis, İqor Payşao, Romelu Lukaku... Bunlar hamısı ''Fənər''in gündəmində yer alan forvardlardı.

Bu arada Lukakunun son hərəkəti diqqət çəkib. Belə ki, tanınmış belçikalı forvard ''Fənər''in rəsmi səhifəsinin ''instaqram''dakı son paylaşımına ''layk'' qoyub. Bu da transfer dedi-qodularını artırıb.

Lukaku zatən bir müddət öncə tətilini keçirmək üçün Türkiyəyə gəlmişdi. Belə güman olunur ki, 32 yaşlı hücumçu həmin vaxt Türkiyəyə həm ziyarət, həm ticarətə gəlibmiş.

''TRT Spor''un məlumatına görə menecerlər Lukakunun xidmətini ''Fənər''ə təklif etdikdən sonra tərəflər arasında danışıqlar başlayıb. Ancaq bu futbolçunun son dönəmlərdə zədəyəmeyilli olması İstanbul nəhəngini diqqətli davranmağa vadar edir.

Ötən mövsümü zədə üzündən boşa verən Lukaku ''Napoli''nin heyətində cəmi 7 rəsmi oyuna çıxaraq aktivinə bir qol yaza bilib. ''Sarı-lacivərdlilər''in rəsmisi Cihan Kamer bir müddət öncə verdiyi açıqlamada Avropa Liqasının təsnifatının pley-offuna qədər yeni hücumçu alacaqlarına söz vermişdi.