“Brayton” düşərgəsindən acı xəbər gəlib:

24 yaşlı yarımmüdafiəçi Enok Mvepu sağlıq problemi üzündən karyerasını bitirib. Zambiyalı futbolçuda irsənkeçmə ürək xəstəliyi aşkar olunub. Mvepu sosial şəbəkələrdə azarkeşlərə emosional müraciət ünvanlayıb: “Kiçik Zambiya şəhərciyi Çambişidən olan oğlandan xəbər var. O, İngiltərə premyer-liqasında oynamaqla arzusunu gerçəkləşdirdi. Ancaq hər şeyin bir sonu var – xəbər verməyə məcburam ki, həkimlərin məsləhəti ilə karyeramı bitirməliyəm. Bu yolumun sonu deyil. Futbolda qalmağa planlaşdırıram, sadəcə, artıq başqa rolda. Fürsətdən yararlanıb, bu futbol səyahəti boyunca məni dəstəkləyən hər kəsə təşəkkür edirəm. Xanımıma, ailəmə, agentimə, həmçinin “Brayton”un əməkdaşlarına və komanda yoldaşlarıma”.

“Brayton”un yeni baş məşqçisi Roberto De Zerbi də məyusdu: “Enoka görə təəssüflənirəm. O, birgə çalışmağı çox istədiyim oyunçulardan biridi. Ona yardım etmək üçün əlimizdən gələni əsirgəçməyəcəyik”.

Mvepunun transferi “Brayton” üçün rekord idi
Mvepu “Brayton”a 2021-in yayında “Zaltburq”dan gəlmişdi. Həmin vaxt İngiltərə klubu 23 milyon avrodan keçməklə özünün transfer rekordunu müəyyənləşdirdi. Avstriyaya isə Enok 2017-yə də qədəm qoymuşdu – vətəni Zambiyanın “Napsa Stars” və “Kafu Seltiks” klublarında oynayandan sonra.

Mvepu 2017/18 mövsümünü “Zaltsburq”un Avstriyanın 2-ci dəstəsində oynayan farm-klubunda – “Liferinq”də keçirdi. Növbəti – 2018/19 mövsümündən etibarən isə “Zaltsburq”un əsas komandasında müntəzəm oynamağa başladı – Avstriyanın top-klubunda ümumilikdə 119 oyun keçirdi, 18 qol vurdu və 20 məhsuldar ötürmə verdi.

Zambiyalı “Brayton”dakı ilk mövsümü normal keçirdi. Premyer-liqada cəmi 18 oyuna çıxsa da, 2 qol və 4 məhsuldar ötürmə ilə yadda qaldı. Bu mövsüm çempionatda cəmi 211 dəqiqə oynadı. Mvepu karyerasındakı son oyunu “Lester”ə qarşı keçirdi – 84 dəqiqə oynadı və məhsuldar ötürmə verməyə imkan tapdı. “Brayton” isə həmin oyunda “tülkülər”i darmadağın etdi (5:2).