Bu həftə avrokuboklarda 2-ci təsnifat mərhələsinin cavab oyunları keçiriləcək. Təbii ki, Azərbaycan klubları da iş başında, yəni yaşıl meydanda olacaq.

Xatırlayırsızsa, ilk matçlarda yalnız “Sabah” qələbə qazana bildi. Həmin qələbənin də minimalhesablı olduğunu nəzərə alsaq, bütün cütlərin taleyinə qarşıdan gələn görüşlərdə aydınlıq gələcək. Odu ki, bizi bir-birindən maraqlı matçların gözlədiyinə şübhə yoxdu. İndi isə həmin oyunlarla bağlı detallara keçid alaq.

Çempionlar Liqası
2-ci təsnifat mərhələsi, cavab oyunu
KuPS (Finlandiya) – Sabah 0:1
Velko Simiç, 52
Hakimlər: QAL LEYBOVİÇ, Roy Hassan, Yossi Babayoff, Dekel Zino (hamısı İsrail).
28 iyul. Kuopio, “Vare Arena”. Saat 19.00.
İlk oyun – 0:1.

Evdə böyükhesablı qələbə qazanmaq fürsətini əldən verən “Sabah” səfərdə ən azı heç-heçə uğrunda mübarizə aparacaq. Çünki yalnız bu halda mərhələ adlamaq imkanı olacaq. Axı “bayquşlar” “Bank Respublika Arena”da keçirilən qarşılaşmada 17 tutarlı hücum cəhdindən yalnız birini qolla tamamladı. Məlum olduğu kimi, Masazır təmsilçisi istəyinə çatsa, tarixində ilk dəfə avrokubokların, daha dəqiqi, hələlik Konfrans Liqasının liqa mərhələsinə vəsiqə qazanacaq. Öz aramızdı, bu amal uğrunda sonadək döyüşməyə dəyər. O başqa məsələ ki, KuPS da hədəfə çatmağa çalışacaq. Masazırda qeydə alınan nəticə Finlandiya təmsilçisinin özünəinamını artırıb. Rəqibin psixoloji durumu yüksək səviyyədədi. Ölkə çempionatında keçirilən oyunda VPS-i məğlub edərək zirvədəki yerini möhkəmləndirən komanda “doğma divarlar” arasında növbəti uğuru qazanmaq üçün dəridən-qabıqdan çıxacaq. Süni örtük, azarkeş dəstəyi, hava şəraiti kimi amillər meydan sahiblərinin tərəfindədi. Odu ki, “Sabah”ın çətin sınaq qarşısında olduğunu deməliyik.

Hər halda, favorit bizim çempiondu və təmsilçimizdən qələbə gözləməyə ixtiyarımız çatır. Buna həm baş məşqçi Valdas Dambrauskasın təcrübəsi, həm də heyətin keyfiyyəti imkan verir. Pis sürpriz qeydə alınıb-alınmayacağını isə bu gün görəcəyik.

Yeri gəlmişkən, “bayquşlar”ı səfərdə təxminən 50 azarkeş dsətəkləyəcək. Bu barədə qəzetimizə klubun mətbuat xidmətinin rəhbəri Elnur Həmidov məlumat verib.

Avropa Liqası
2-ci təsnifat mərhələsi, cavab oyunu
ÇSKA (Sofiya, Bolqarıstan) – Qarabağ
Hakimlər: BRAM VAN DRİŞE, Mişel Seldrayers, İv de Neve, Kevin van Damm (hamısı Belçika).
30 iyul. Sofiya, Vasil Levski Milli stadionu. Saat 22.00.
İlk oyun – 0:0.

“Qarabağ” Tofiq Bəhramov adına Respublika stadionunda nəinki azarkeşləri, bütün futbol ictimaiyyətini məyus etdi. Azı ona görə ki, hamı bir nəfər kimi “köhlən atlar”dan qələbə gözləyirdi və bu gözləntilər sadəlövhlüyün əsəri deyildi. Axı ən pis halda Qurban Qurbanovun təcrübəsinin ön plana çıxacağı, kollektivin “doğma divarlar” arasında, 23 mindən çox tərəfdarın önündə layiqli nəticə qazanacağı düşünülürdü. Belədə olanla ölənə çarə yoxdu deyib, önə baxmaqdan başqa yol qalmır. Hələ hər şey bitməyib. Cavab matçında qalib gəlməklə növbəti mərhələyə yüksəlmək mümkündü.

Düzdü, ağdamlıların heyətlə bağlı problemləri var. Görünür, yeni futbolçuların komandaya uyğunlaşması üçün daha çox vaxta ehtiyac olacaq. Bununla belə, yuxarıda da vurğuladığımız kimi, təcrübə amilinə arxalanmaq olar. Əlbəttə, “Qarabağ”ın rəqibini, demək olar, heç nədə üstələmədiyini deyənlər var. Lakin dəfələrlə imkansızı bacaran “köhlən atlar”a inanmalı, səfər oyununda lazımi nəticəni qazanacağına ümid etməliyik.

Konfrans Liqası
2-ci təsnifat mərhələsi, cavab oyunları
Zirə - Payde (Estoniya)
Hakimlər: PATRİK KOLARİÇ, İvan Yaniç, Dino Knez, Patrik Pavleşiç (hamısı Xorvatiya).
30 iyul. Sumqayıt, “SOCAR Polymer Arena”. Saat 20.00.
İlk oyun – 0:1.

Ötən həftə ümidləri doğrultmayan komandalardan biri də “Zirə” oldu. “Qartallar” “Torpedo” ilə matçlardan fərqli müdafiə olunmağa üstünlük verdi ki, cəzasını son dəqiqələrdə qol buraxmaqla çəkdi. İndi qəsəbə təmsilçisi ən azı bir qol vurmağa məcburdu. Əks halda, Rəşad Sadıqovun komandası üçün avrokubok macərası başa çatacaq. Təbii ki, “Zirə”nin istəyinə çatmaq üçün potensialı var. Əsas məsələ baş məşqçinin oyun planı və strategiyasının meydanda necə əksini tapacağıdı. Yəqin ki, mütəxəssis səfər matçını ən yaxşı şəkildə təhlil edib və səhvlərdən nəticə çıxarıb. Bizə ona ümid etmək qalır ki, “qartallar” evdə rəqib üzərinə şığıya bilsin və mərhələni adlamağa nail olsun.

Qeyd edək ki, sabah saat 15.00-da “Wyndham Garden Baku Hotel”də Rəşad Sadıqovun, 18.30-da “SOCAR Polymer Arena”da rəqibin məşqçisi Tarmo Kinkin mətbuat konfransları keçiriləcək. “Zirə”nin media üçün açıq məşqi saat 18.30-da Bakı Olimpiya Stadionunun ehtiyat meydançasında, “Payde”nin media üçün açıq məşqi isə saat 19.00-da matçın keçiriləcəyi stadionda olacaq.

Maraq üçün bildirək ki, bu oyunu əslində Dario Bel idarə edəcəkdi. Lakin martın 21-də Xorvatiya çempionatının “Vukovar” – “Hayduk” matçında axil vətəri qırılan referi müalicə olunmasına rəğmən, sağlamlığını tam bərpa etməyib. UEFA bu səbəbdən baş hakim təyinatında dəyişiklik edib və bu vəzifə Belin həmyerlisi Patrik Kolariçə həvalə olunub. Köməkçi və dördüncü hakimlər isə dəyişməyib.

Dinamo-Minsk (Belarus) – Neftçi
Hakimlər: TİM MARŞAL, Georgios Arqiropulos, Rayan Kelsi, Şeyn MakQoniql (hamısı Şimali İrlandiya).
30 iyul. Stara-Zaqora, “Beroe”. Saat 21.00.
İlk oyun – 4:2.

“Neftçi” ilk oyunda sözün əsl mənasında faciə ilə üzləşdi. İlk 8 dəqiqədə iki qol vuran “ağ-qaralar” qalan vaxtda nə az, nə çox - 4 top buraxdı və növbəti mərhələ üçün şanslarını minimum endirdi. Yenə də bakılılara könül verən azarkeşlər komandanın səfərdə geridönüş edəcəyinə inanır. Reallıq isə fərqlidi. Minsk təmsilçisi bu cür üstünlüyü əldən verməmək üçün əlindən gələni edəcək. Odu ki, “ağ-qaralar”a yalnız fövqəlbəşər güc yardım edə bilər. Burda həm də Yuri Vernidub təcrübəsini ortaya qoymalı, ən çətin sınaqlardan üzüağ çıxmaqda mahir olduğunu sübut etməlidi.
Qeyd edək ki, “Neftçi” sabah səhər saatlarında Bolqarıstana yola düşəcək. Həmin gün baş məşqçi Yuri Vernidubun iştirakı ilə Bakı vaxtı ilə saat 19.30-da mətbuat konfransı keçiriləcək. 20.00-da isə komandanın media üçün açıq məşqi baş tutacaq.

Yeri gəlmişkən…
KuPS – “Sabah”, “Dinamo-Minsk” – “Neftçi” matçları “İctimai” TV-də, ÇSKA – “Qarabağ” oyunu “CBC Sport”da, “Zirə” – “Payde görüşü isə “İdman TV”də canlı yayınlanacaq.

KƏNAN BAHADIR