Maşallah Əhmədovdan sərt ittiham: “Kəpəz”in bərbad vəziyyətdə olmasının səbəbkarı İlqar Nadiridi"
Qəzetimizin saytına müsahibə verən veteran futbolçu (hərçənd özü bu sözü bəyənmir) Maşallah Əhmədov “Kəpəz”in bugünkü durumundan narahatlığını dilə gətirmiş, klubun Müşahidə Şurasının sədri İlqar Nadirinin futboldankənar adam olduğunu bildirmişdi.
Onu da əlavə etmişdi ki, məhz klub rəhbərinin yarıtmaz fəaliyyətinin nəticəsi kimi “sarı-göylər” hazırda bərbad vəziyyətdədi.
Əhmədov dünən yenə redaksiamızla əlaqə saxlayaraq ona tribuna verilməsini xahiş etdi. Veteran futbolçunun söylədiklərini diqqətinizə çatdırırıq:
“Bir neçə gün öncə “Football-plus.az” saytında həm “Kəpəz”, həm “Neftçi”, həm də yığma ilə bağlı fikirlərimi bölüşmüşdüm. Üstündən bir neçə saat keçməmişdi ki, “Kəpəz”in Müşahidə Şurasının sədri İlqar Nadirinin adamları öz aləmlərində sosial şəbəkələrdə söylədiklərimə cavab veriblər. Ünvanıma müxtəlif xoşagəlməz fikirlər səsləndiriblər. Mən yenə fikrimdə qalıram, “Kəpəz”in bu günə düşməsinin əsas səbəbkarı Nadiridi. Orda-burda deyir ki, evimi satıb komandaya öz cibimdən 100 min manat xərcləmişəm. İndi AFFA-dan həmin pulu istəyir. Sən nə vaxtdan klub üçün bu addımı atan olmusan? SSRİ dönəmində dövlətdən gizli fəaliyyət göstərən sexlər var idi. Orda az tapılan, bazarda yaxşı pula gedən mallar istehsal olunurdu. Təbii ki, keyfiyyyət baxımından həmin məhsullar fabrik istehsalına uduzurdu. Sadəcə, qıtlıq idi deyə, hamı həmin məhsullardan alırdı. Bu gün Nadiri də “Kəpəz”i həmin sexlər kimi işlədir. Ötən dəfə sizə demişdim, yenə təkrarlayıram, Nadiri yaxınlarını yüksək maaşla klubda işlə təmin edib. Dayısıoğlunu stadion direktoru, xalasıqızını mühasib təyin edib. Belə özbaşınalıq olar? “Kəpəz”onun şəxsi malıdı? Yazırlar ki, niyə Maşallah Əhmədov Elmar Vəliyevin vaxtında bir söz demirdi? Niyə Elxan Məmmədov Bakıda işləyəndə danışmırdı? Elmar müəllim icra başçısı olarkən “Kəpəz” avrokuboklarda çıxış etdi. Onda deyərdim ki, niyə komanda qitəmiqyaslı yarışa gedir? Elxan Məmmədova gəlincə, həmişə heç kimdən çəkinmədən, qorxmadan sözümü demişəm. Qorxum yalnız Allahdandı. Kiminsə sayəsində futbola gələn cavan oğlan mənə deyir ki, gəl, Müşahidə Şurasının üzvü ol. Yəni bu sədr, həyatını futbola həsr edən, SSRİ-nın ən tanınmış fubolçularından biri sıravi üzv... Gəncənin indiki icra başçısı Niyazı Bayramovla aramızda isti münasibət var. Çox gözəl insandı. Təəssüf ki, özü də dediyi kimi, futboldan o qədər də anlayışı yoxdu. İlqar kimilər də bundan öz xeyirləri üçün istifadə edir”.
Əhmədov “Kəpəz”dəki vəziyyətə və kadr problemlərinə də toxundu:
“Gəncəli veteranlar işsiz qaldığı halda, Nadirinin qohumları, dostları klubda işləyir. Hərçənd futbolla yaxın-uzaqdan əlaqələri olmayıb. Təsəvvür edin ki, premyer-liqa klubu səfər oyunundan öncə Olimpiya Kompleksində məskunlaşır. Belə biabırçılıq olar? Səbəb hamıya bəllidi. Başqa otellərdən fərqli Olimpiya Kompleksləri ucuzdu. Sənəd üzərində yüksək ödəniş yazıb, komandanı ucuz yerdə məskunlaşdırırlar. Futbolçular səfər oyunlarına gedərkən yolda içdikləri çayın pulunu özləri ödəyir. Belə peşəkar klub harda görünüb? Bir sözlə, “Kəpəz”in bərbad vəziyyətdə olmasının səbəbkarı İlqar Nadiridi. Bu məsələni içtimailəşdirəcəm ki, Gəncə futbolunda yaşanan biabırçılıqlardan hamının xəbəri olsun”.
RƏŞAD
Digər xəbərlər
