“Sabah”a nə olub”, “Murad Musayevin çalışdırdığı komanda niyə qələbə qazana bilmir” sualı son günlər tez-tez səslənir.

Ölkə futbolunu yaxından izləyənlər son oyunlarda “tələbələr”in heç də özünə bənzəmədiyini dilə gətirir, bir ay əvvəl “Sabah” çempionluğa iddiasını davam etdirir” deyənlər indi “komanda hələ “qızıl” qazanmağa hazır deyil” kimi fikirlər səsləndirir. Premyer-liqanın 16-cı turunda Masazırda keçirilən oyunda komanda “Şamaxı” ilə heç-heçə edəndə çoxları “şirlər”in, sadəcə, bəxt sayəsində “Bank Respublika Arena”dan 1 xalla ayrıldığını qeyd etdi. Ondan sonra “tələbələr” ölkə kubokunun 1/4 finalının ilk oyununda “Səbail”ə boyun əydi. Bəzi futbol biliciləri “dənizçilər”ə yenilgini də bəxtlə əlaqələndirməkdən çəkinmədi. Ancaq unudurdular ki, futbolda bəxt də, uğur ilahəsi də güclünün tərəfində olur. Ardınca Murad Musayevin komandası Gəncəyə yollandı. “Kəpəz”lə matçda bir daha göründü ki, “tələbələr” “qara zolağ”a düşüb. Daim meydana qələbə üçün çıxan, oyun intizamına əməl edən, rəngarəng, kreativ hücumlar qurmağı xoşlayan, hücumda kəsərli, müdafiədə isə etibarlı oyunu ilə seçilən komandadan əsər-əlamət qalmayıb. Böhranın kuliminasiya nöqtəsi isə kubokda “Səbail”lə cavab qarşılaşması oldu. Hazırda premyer-liqada sonuncu pillədə qərarlaşan “dənizçilər” bir ara “Qarabağ”ın nəfəsini kürəyində hiss etdiyi “Sabah”ı mübarizədən kənarlaşdırdı. Özü də ikinci görüşdə də qələbə qazanmaqla. Bəs “Sabah”a nə olub? Niyə çempionatda passivində cəmi 1 məğlubiyyət olan kollektiv ölkə kubokunun 1/4 finalının hər iki oyununda autsayderə boyun əydi? Bu yazıda enişin səbəblərini üzə çıxarmağa çalışacam.

“Çemodan” ab-havası
Dekabr Azərbaycan komandaları üçün həmişə ağır ay sayılıb. Xüsusilə də heyətində legionerlərin çox olduğu kollektivlər üçün. Fasilə ərəfəsində baş məşqçilər çox çalışsa da, yetirmələrinin diqqətini oyunlara yönəldə bilmirlər. Əcnəbilər istirahəti, qarşıda gələn Milad bayramını harda və necə keçirəcəyi ilə bağlı planlar qurur ki, bu da istər-istəməz meydanda əksini tapır. Obrazlı desək, demək olar, bütün legionerlər ilin son ayında “çemodan” əhval-ruhiyyəsində olur. Bu problem tək “Sabah”da yox, premyer-liqanın başqa klublarında da özünü göstərir. Son oyunlarda “Qarabağ”, “Neftçi” və “Zirə”nin legionerlərinin timsalında da bunuı görmək mümkündü. Yolüstə olan adam isə özündən asılı olmayaraq, toparlana bilmir, fikri yaşıl meydandan, qarşıdakı son iki-üç oyundan çox tətil keçirəcəyi məkanda olur. Böyük ehtimalla “Sabah”ın futbolçuları da artıq tətil ab-havasındadı. Bu səbəbdən Murad Musayevin komandası son görüşlərdə istənilən səviyyədə çıxış edə bilmir.

Arxayınlıqdan irəli gələn uğursuzluq
“Sabah”ın mövsümə çox yaxşı başladığını heç kim inkar edə bilməz. Ötən mövsüm avrokuboklardan kənarda qalan komanda bu il həm mükafatçılar arasında yer almağı, həm də qitəmiqyaslı turnirə yollanmağı qarşısına hədəf qoyub. Və bu səbəbdən “tələbələr” 2022/23 “futbol ili”nə Murad Musayevin rəhbərliyi altında uğurlu start verməklə yadda qaldı. Noyabrın 11-nə təsadüf edən və 10 min azarkeşin stadionda izlədiyi “Qarabağ”la oyundan sonra ölkə mətbuatında “Sabah”ın tərifi göyün yeddinci qatına yüksəldi. Artıq idman mediası özünə yeni qəhrəman, “Qarabağ”a “əlcək ata” biləcək səviyyədə oyun sərgiləyən “ağatlı oğlan” tapmışdı. İnsafən, həmin görüşdə “tələbələr” adlı-sanlı rəqiblə başabaş mübarizə aparmaqla yadda qalmışdı. Yaxaladığı qol imkanlarından yararlana bilsəydi, Musayevin komandası 90 dəqiqəni qalib kimi də başa vura bilərdi. “Sabah”a nə oldusa, ondan sonra oldu. Növbəti turda Tovuza səfər edən komanda çətinliklə son dəqiqələrdə vurduğu bir qolla 3 xal qazandı. Artıq onda “bayquşlar”ın bəzi futbolçularının tərifdən başının gicəlləndiyi hiss olunurdu. Komanda meydana o qədər arxayın çıxırdı ki, sanki 3 xal artıq onların cibindədi. Məhz bu arxayınlıq, yersiz və erkən rahatlaşmaq “Sabah”ın böhran yaşamasına səbəb oldu.

“Meydanın hər qarışı uğrunda külüng vururdularsa...”

Yuxarıda qeyd etdiklərim subyektiv fikirlərdi. Bəs görəsən, mütəxəssislər bu barədə nə düşünür? Bugünlərdə PRO kateqoariyasını alan, baş məşqçi kimi iki dəfə ölkə kubokunu qazanan Sənan Qurbanovun fikirlərini dinləyək: