Premyer-liqada növbəti oyunlar keçirildi.

Bəribaşdan qeyd edək ki, 17-ci tur turnir cədvəlində dəyişikliyə səbəb olmadı. Doğma meydanda “Qəbələ”ni qəbul edən “Qarabağ” çətinliklə olsa da, qələbə qazandı. Qurban Qurbanovun komandası “qırmızı-qaralar”ı penalti sayəsində minimal hesabla üstələdi. Adını tabloya yazdıran Ramil Şeydayev isə bombardirlik yarışında addım-addım əsas izləyicilərindən uzaqlaşır. Forvardın hesabında artıq 13 qol var.

Football-plus.az xəbər verir ki, liderin ən yaxın izləyicisi “Sabah” Gəncədə heç-heçə etməklə futbol ictimaiyyətini növbəti dəfə təəccübləndirdi. Ötən tur öz meydanında “Şamaxı” ilə bərabərə qalan “tələbələr” bu dəfə eyni aqibəti “Kəpəz”lə oyunda yaşadı. Deyəsən, Murad Musayevin baş məşqçisi olduğu komandanın düşərgəsində hələ ki mətbuata bəlli olmayan xoşagəlməz nələrsə yaşanır. Bir neçə tur öncə “Qarabağ”la xal fərqi 3 idisə, hazırda 7-yə bərabərdi. Ya futbolçular artıq “çamadan” ab-havasındadı və oyunlara köklənə bilmirlər, ya da yuxarıda qeyd etdiyimiz kimi düşərgədə fikir ayrılığı, ikitirəlik yaşanır. Vəlvələdən, ya zələzələdən, görünən odu ki, fasilə ərəfəsində “tələbələr”in gücü tükənib.

17-ci oyun həftəsi “Sumqayıt” üçün düşəli oldu. “Kimyaçılar” “Kəpəz”dən sonra “Səbail”i yenməklə mövsümdə ardıcıl ikinci qələbəsini bayram etdi. “Dənizçilər” üzərində qələbə Samir Abasovun komandasının turnir vəziyyətinə də təsir göstərdi. Uzun müddət “zirzəmi”də qərarlaşan kollektiv 8-ci pilləyə yüksəldi. “Səbail”in durumu isə heç də xoşagələn deyil. Kubokun 1/4 finalının ilk görüşündə “Sabah”ı yenən Mahmud Qurbanovun çalışdırdığı kollektiv premyer-liqada istənilən səviyyədə çıxış etmir. “Dənizçilər” artıq “dib”ə yuvarlanıb. Komanda kubokda da uğursuzluğa düçar olsa, Qurbanov postunu itirə bilər.

17-ci turda bir heçə-heçə qeydə alındı. İkinci dövrədə “Qarabağ”dan başqa heç bir komandaya uduzmayan “Şamaxı” bu dəfə “Zirə”dən xal aldı.

“Neftçi”ni çətin Tovuz səfəri gözləyirdi. Bu iki komanda arasında ilk dövrədə Bakıda keçirilən qarşılaşmada heç-heçə qeydə alınmışdı ki, buna görə paytaxt təmsilçisi çox tənqid olunmuşdu. Bu dəfə də Ayxan Abbasovun yetirmələri kiçik sensasiyaya imza atmağa yaxın idi. Ancaq daha təcrübəli rəqib buna imkan vermədi və Emin Mahmudov penaltidən fərqlənməklə komandasına hava-su kimi lazım olan 3 xalı qazandırdı. “Boz qurdlar” “doğma divarlar” arasında uduzsa da, xoş sözlərə layiqdi. Meydan sahibləri oyun planında adlı-sanlı rəqibdən heç də geri qalmadı, hətta irəli xətdə yer alan futbolçular bir qədər dəqiq olsaydıllar, qələbə də qazana bilərdilər. Ancaq sonda ayrı-ayrı futbolçuların fərdi ustalıq səviyyəsi sözünü dedi və “Neftçi” mövsümdə 11-ci qələbəsini bayram etdi. Bu qələbə sayəsində paytaxt təmsilçisi ikinci pillədə qərarlaşan “Sabah”la xal fərqini 5-ə endirsi.

Misli premyer-liqası
2-ci dövrə, 17-ci tur
13 dekabr
Şamaxı – Zirə 0:0
Qarabağ – Qəbələ 1:0

14 dekabr
Sumqayıt – Səbail 2:0
Kəpəz – Sabah 2:2

15 dekabr
Turan Tovuz – Neftçi 0:1

1. Qarabağ 17 15 2 0 45-8 47
2. Sabah 17 12 4 1 34-13 40
3. Neftçi 17 11 2 4 32-19 35
4. Zirə 17 8 3 6 18-22 27
5. Qəbələ 17 7 3 7 20-18 24
6. Turan Tovuz 17 4 4 9 11-22 16
7. Şamaxı 17 2 7 8 14-25 13
8. Sumqayıt 17 2 6 9 10-24 12
9. Kəpəz 17 2 5 10 14-33 11
10. Səbail 17 2 4 11 13-27 10

Bombardirlər: Ramil Şeydayev (Qarabağ) – 13, Musa Qurbanlı (Qarabağ) – 11, Emin Mahmudov (Neftçi) – 10, Coy-Lens Mikels (Sabah) – 8.

Növbəti turun oyunları: 23 dekabr – Neftçi – Şamaxı, Sumqayıt – Sabah; 24 dekabr – Qəbələ - Turan Tovuz, Səbail – Qarabağ; 25 dekabr – Zirə - Kəpəz.

RƏŞAD