Misli premyer-liqasının 13-cü turu sürpriz nəticələrlə yadda qaldı.

Turun açılış oyununda “Turan Tovuz” doğma azarkeşləri qarşısında “Şamaxı”nı qonaq edib. Matçdan öncə çoxları demək olar hamı meydan sahiblərini favorit kimi görürdü. Ancaq “şirlər” bütün proqnozları alt-üst edərək çətin qərb səfərindən 3 xalla geri dönməyi bacardı. Bu oyuna kimi premyer-liqada qələbə qazanmayan 2 komanda var idi ki, onlardan biri “Sumqayıt”, o biri “Şamaxı” idi. Artıq Vüqar Əsgərov- Cavid Hüseynov tandeminin çalışdırdığı kollektiv də nəhsdən çıxa bildi. Qonaqların Tovuzda gözlənilməz uğuru yerli azarkeşlərlə Ayxan Abbasov arasında narazılıq yaratdığını da vurğulamaq lazımdı. Tovuzlular 90 dəqiqənin tamamında Abbasovu istefaya səsləməklə yadda qaldılar.

Turun maraqla gözlənilən qarşılaşmalarından biri də Qəbələ də baş tutdu. Turnir cədvəlində qonşu olan komandaların görüşündə meydan sahibləri “Zirə”ni minimal hesabla üstədilər. Ülvi İsgəndərovun uzaq məsafədən vurduğu qol komandasına 3 xal gətirməklə yanaşı, mövsümün “ən gözəl qolu”na da namizəd ola bilər.

Turun digər gözlənilməz nəticəsi “Kapital Bank Arena”da qeydə alındı. 12 tura rəqib qapılarından cəmi 2 top keçirən “Sumqayıt” “Neftçi” ilə matçda 90 dəqiqədə eyni sayda qol vurdu. Meydan sahibləri matçboyu 2 dəfə hesabda önə çıxsalarda, qonaqlar çətinliklə də olsa hesablı bərabərləşdirib Sumqayıtdan 1 xalla döndülər. “Ağ-qaralar”ın autsayderlə qarşılaşmada xal itirməsi onların ilk iki pillədə gedən kollektivdən uzaq saldı. Artıq “Qarabağ” “Neftçi”ni 10, “Sabah” isə 8 xal qabaqlayır. “Kimyaçılar” isə şənbə günü mövsümdə ən yaxşı oyununu keçirdi desək, yanılmarıq. Samir Abasov isə texniki zonadan qovulmaqla 2022/23 “futbol ili”ndə siftəni etdi.

“Səbail”in uğursuz seriyası isə davam edir. Ötən tur səfərdə “Kəpəz”ə yenilən Mahmud Qurbanovun çalışdırdığı kollektiv bu dəfə öz meydanında “Sabah”a boyun əydi. Oyun planında “dənizçilər” ilk dövrədə bərabərə qaldığı “tələbələr”dən geri qalmasalar da fərdi səhvlər meydan sahiblərinə baha başa gəldi.

Həftəiçi “Frayburq”la ağır oyun keçirən “Qarabağ”ın “Kəpəz”lə matçda çətinlik çəkməyəcəyi əvvəlcədən məlum idi. Ehtimallar özünü doğrultdu. Ağdamlıların və çempionatın iki ən sərrast futbolçusu – Musa Qurbanlı və Ramil Şeydayev Gəncə təmsilçisi ilə görüşdə fərqlənməklə bombardirlik yarışında rəqiblərindən bir qədər də uzaqlaşdılar.

Misli premyer-liqası.
2-ci dövrə, 13-cü tur.
4 noyabr
Turan Tovuz - Şamaxı 1:3
5 noyabr
Qəbələ - Zirə 1:0
Sumqayıt - Neftçi 2:2
6 noyabr
Səbail - Sabah 0:2
Qarabağ - Kəpəz 3:1

1. Qarabağ 12 12 0 0 38-8 36
2. Sabah 13 11 1 1 30-10 34
3. Neftçi 13 8 2 3 26-14 26
4. Qəbələ 13 6 2 5 17-13 20
5. Zirə 13 6 1 6 15-21 19
6. Turan Tovuz 12 4 3 5 10-16 15
7. Səbail 13 2 4 7 11-19 10
8. Kəpəz 13 2 2 9 11-29 8
9. Şamaxı 13 1 4 8 8-21 7
10. Sumqayıt 13 0 5 8 4-19 5

Bombardirlər: Ramil Şeydayev, Musa Qurbanlı ( hər ikisi "Qarabağ") – 11, Coy Lens Mikels (Sabah) – 7.
Növbəti turun oyunları: 11 noyabr – Şamaxı – Sumqayıt; 12 noyabr – Zirə - Səbail, Neftçi – Qəbələ; 13 noyabr – Kəpəz – Turan Tovuz, Sabah – Qarabağ.

RƏŞAD