Premyer-liqada 11-ci tur geridə qaldı. Hesabat turunda “Qarabağ” öz meydanında “Turan Tovuz”la üz-üzə gəldi.

Bu yerdə onu da xatırladaq ki, bu komandaların ilk dövrədəki görüşü noyabrın 9-na “sürüşdürüldüyündən” cari mövsümdə ilk dəfə qarşılaşırdılar. Gözlənildiyi kimi, oyun ağdamlıların qələbəsi ilə başa çatdı. Bir qarşılaşmanın ertələndiyini nəzərə alsaq, “Qarabağ” 2022/23 “futbol ili”ndə xal itirməyən yeganə kolelktivdi. Qurban Qurbanovun komandası maksimum nəticə ilə çempionatın vahid lideri kimi yoluna davam edir. Ramil Şeydayev isə Tovuz təmsilçisi ilə görüşdə 10-cu qolunu vurdu. Hücumçu hazırda ən yaxın izləyicisi olan komanda yoldaşı Musa Qurbanlıdan 2 qol artıq vurmaqla bombardirlər yarışında liderdi.

“Şamaxı” “Səbail”lə səfər oyununda heç-heçə etməklə sonuncu pillkədən qurtuldu. “Şirlər” 4-cü xalını qazanaraq "Sumqayıt"a çatdı və top fərqinə, eyni zamanda öz aralarında birinci dövrədə baş tutan oyunun nəticəsinə görə 9-cu pilləyə yüksəldi.

Turun mərkəzi oyunu “Bakcell Arena”da keçirildi. “Neftçi” 3 xal geridə olduğu “Sabah”ı qonaq edirdi. Bu matçı meydan sahibləri üçün 6 xallıq oyun da adlandırmaq olardı. “Ağ-qaralar” qələbə qazanacağı təqdirdə “tələbələr”lə xalını bərabərləşdirib, 2-ci yer uğrunda mübarizəni davam etdirəcəkdi. Uduzacağı halda isə Murad Musayevin komandası bir qədər nəfəs alacaqdı. 90 dəqiqənin sonunda sevinən tərəf “tələbələr” oldu. Bu, “ağ-qaralar”ın cari mövsümdə öz meydanında ilk məğlubiyyəti idi. İndi “Neftçi” 3-cü yerdə qalmağın planlarını cızmalıdı. Növbəti həftə Regekampfın komandasını “Zirə” ilə matç gözləyir. “Qaratallar” 12-ci tur ərəfəsində “ağ-qaralar”dan cəmi 3 xal geri qalır. Heç şübhəsiz, Rəşad Sadıqov və komandası bunu gözəl anlayır və qarşıdakı görüşdə bu fərqi aradan qaldırmaq üçün meydana qələbə çıxacaq. “Neftçi”də zədəlilərin və cəzalıların çox olduğunu nəzərə alsaq, paytaxt klubunu ağır oyun gözlədiyini indidən söyləyə bilərik.

“Zirə” isə 11-ci turda Sumqayıta səfər etdi. Şəhərin eyniadlı təmsilçisinin qara günləri davam edir. Aleksey Baqanı yola salıb Samir Abasovu “sükan arxasına” dəvət edən “kimyaçılar” hələ ki uğursuzluq yaşayır. Bakıətrafı qəsəbə təmsilçisi “Kapital Bank Arena”dan çətinlik çəkmədən 3 xalla qayıtdı. Abasovun gəlişindən sonra “Sumqayıt”ın oyununda müəyyən canlanma hiss olunsa da, bu 3 xal üçün kifayət etmir. Obrazlı desək, dirijor dəyişsə də, orkestr not tanımayan həvəskar musiqiçilərdən formalaşdığından tamaşaçılar “bozbaş” musiqi dinləməyə məcburdu.

“Qəbələ” də azarkeşlərini məyus edir. “Qırmızı-qaralar” ötən tur austsayder “Şamaxı” ilə heç-heçə etmişdisə, bu dəfə turnir cədvəlinin “quyruğunda” qərarlaşan “Kəpəz”in müqavimətini qıra bilmədi. Halbuki bu iki oyunda 4 xal itirilməsəydi, bölgə təmsilçisi “Zirə”ni qabaqlayaraq 4-ci pillədə yer alacaqdı. Yeri gəlmişkən, Qəbələdəki matçda qonaqların heç də pis təsir bağışlamadığını vurğulamaq lazımdı. Tərlan Əhmədovun gəlişindən sonra “sarı-göylər”də oyun intizamı qaydasına düşüb, kollektivdə özünəianm yaranıb. Düzdü, bu hələ istənilən səviyyədə deyil, turnir cədvəlinin üst qatında qərarlaşan komandalarla görüşlərdə gəncəlilər o qədər də yaxşı təsir bağışlamır. Ancaq səviyyə baxımından yaxın olduğu rəqiblərlə qarşılaşmalarda komanda özünü yaxşı tərəfdən göstərir.

Misli premyer-liqası
2-ci dövrə, 11-ci tur
20 oktyabr
Qarabağ – Turan Tovuz 3:0
22 oktyabr
Sumqayıt – Zirə 0:2
Qəbələ - Kəpəz 1:1

23 oktyabr
Neftçi – Sabah 2:3
Səbail – Şamaxı 0:0
1. Qarabağ 10 10 0 0 31-7 30
2. Sabah 11 9 1 1 26-9 28
3. Neftçi 11 7 1 3 21-12 22
4. Zirə 11 6 1 4 15-17 19
5. Qəbələ 11 5 2 4 15-11 17
6. Turan Tovuz 10 3 3 4 8-13 12
7. Səbail 11 2 4 5 11-14 10
8. Kəpəz 11 1 2 8 7-26 5
9. Şamaxı 11 0 4 7 5-16 4
10. Sumqayıt 11 0 4 7 2-16 4

Bombardirlər: Ramil Şeydayev (Qarabağ) – 10, Musa Qurbanlı (Qarabağ) – 8, Coy-Lens Mikels (Sabah) – 7, Runi Eva (Turan Tovuz), Ağabala Ramazanov (Səbail), Emin Mahmudov (Neftçi) – 5.
Növbəti turun oyunları: 28 oktyabr – Turan-Tovuz - Sumqayıt; 29 oktyabr – Kəpəz - Səbail, Zirə - Neftçi; 30 oktyabr – Şamaxı - Qarabağ, Sabah - Qəbələ.

RƏŞAD