Tanınmış jurnalist Ləman Ələşrəfqızı “feysbuk” hesabında DÇ-nin Braziliya - Serbiya (2:0) matçından sonra maraqlı paylaşım edib.

Onun diqqətimizi çəkən fikirlərini təqdim edirik:

Əlbəttə, sevindirici məqamdı. Qətərdəki mundialda azərbaycanlı yüksək vəzifədə çalışır. Ləman xanımın qeyd etdiyi Rasim bəylə əlaqə saxlayıb, oğlunun nömrəsini aldıq. Ziya ilə işi və dünya çempionatı ilə bağlı söhbətləşdik.

- Əvvəlcə özünü təqdim etməyini istərdim…
- 1986-cı ildə Lənkəranda doğulmuşam. Bakıda orta məktəbi bitirdikdən sonra Azərbaycan Dövlət İqtisad Universitetinin informasiya texnologiyaları və idarəetmə fakültəsində ali təhsil almışam. Universitetdə həmin ixtisas üzrə magistraturaya qəbul olsam da, xaricdə təhsil almaq məqsədilə oranı yarımçıq tərk etmişəm. Hərbi xidməti başa vurandan sonra telekommunikasiya sahəsində işləmişəm. Əmək fəaliyyətinə “McDermott” şirkətində tələbə olarkən başlayıb, sonra “Berke” (Türkiyə), “Huawei” (Çin), “AzərTelecom” şirkətlərində şəbəkə mühəndisi kimi çalışmışam.

- İdman yarışlarında texnoloji təminatla məşğul olursan. Buna necə marağın yarandı?
- Layihələrin idarə edilməsinə göstərdiyim maraq məni idman yarışlarının texnoloji təminatı sahəsinə gətirdi. Bakıda keçirilən 1-ci Avropa Oyunlarında idman sahəsində fəaliyyətə başladım, sonralar 4-cü İslam Həmrəyliyi Oyunları, 5-ci Asiya Oyunları (Türkmənistan), Birlik Oyunları (Avstraliya) kimi nüfuzlu yarışların təşkilat komitəsində işlədim. Tokioya gəlməzdən öncə bir müddət “BakTelecom” (Bakı Telefon Rabitəsi İstehsalat Birliyi) şirkətinin texniki şöbə rəisi vəzifəsində çalışdım. “Tokio 2020” Yay Olimpiya və Paralimpiya Oyunları üzrə təşkilat komitəsində beynəlxalq yayın mərkəzinin texniki meneceri kimi fəaliyyət göstərdim. Burda işlədiyim şöbənin əsas vəzifələrindən biri yarışların nəticələrinin hesablanması üzrə texnologiyaların təminatı olsa da, özüm müxtəlif media və yayınçılara göstəriləcək İT və telekommunikasiya xidmətlərinə cavabdeh idim.

- Bizim üçün maraqlıdı, bu işin hansı çətinlikləri var?
- Bəzilərinə bu proses çox sadə görünə bilər, lakin idman yarışlarının keçiriləcəyi məkanların müvafiq texnologiyalarla təchizatı, bu məqsədlə orda lazımi avadanlığın quraşdırılması, onun texnoloji təminatı çox böyük layihədi və buna illərlə vaxt lazım olur. Bir çox hallarda yarışların həcmi nəzərə alınaraq, həmin idman obyektlərində mövcud infrastrukturdan istifadə edilmir və sıfırdan başlayaraq yeni infrastruktur quraşdırılır. Buna görə də həmin idman obyektlərinin yarışlar üçün hazırlanmasına bir neçə il əvvəldən başlanılır ki, bu da həmin sahə üzrə peşəkar mütəxəssislərin bir yerə toplanmasını tələb edir. Buna görə də müasir idman yarışlarına cavabdeh olan təşkilat komitələri bir neçə il əvvəl təsis edilir və müvafiq işləri həyata keçirir. Bu sahə ilə bağlı mütəxəssislər beynəlxalq səviyyəli sayılırlar və böyük idman yarışları, müxtəlif sərgilər, başqa beynəlxalq tədbirlər zamanı bu işlərə cəlb edilirlər. Təbii ki, bu zaman onların malik olduğu təcrübə və başqa tanınmış mütəxəssislər tərəfindən verilən tövsiyə mühüm rol oynayır.

- Bu sahədə səndən başqa hansısa azərbaycanlı çalışır?
- 2015-ci ildə Bakıda keçirilən 1-nci Avropa Oyunları ilə müqayisədə hazırda Azərbaycanda bu sahə üzrə mütəxəssislərin sayı xeyli artıb. Həmin yarışlar vaxtı əsasən əcnəbilər dəvət edilmişdisə, 2019-cu ildə keçirilən 15-ci Avropa Gənclər Olimpiya Festivalı zamanı əsasən yerli mütəxəssislərdən istifadə olundu. Bu o deməkdi ki, 1-ci Avropa Oyunları həm də Azərbaycanda sözügedən sahə üzrə beynəlxalq səviyyəli mütəxəssislərin yetişməsinə böyük təkan verdi.

- Qətərdəki dünya çempionatına necə cəlb olundun?
- FİFA dünya çempionatı üçün İT menecer vakansiyası elan etmişdi. Mən də müraciət etdim. Ötən ilin ortalarından burdayam. Sadəcə, mundialın sonuna kimi burda olacam. “Lusail Aykonik” stadionunda çalışıram. Burda İT menecerəm. Ümumilikdə bu arenada 10 görüş baş tutacaq. Artıq ikisi geridə qalıb. 8 qarşılaşmadan sonuncusu finaldı.

- Mediada yayılan xəbərlərə görə, Qətərdə təşkilatçılıq yaxşı olsa da, azarkeşlərlə bağlı narahatlıqlar var. Həqiqətən belədi?
- Hər şey yüksək səviyyədədi. Mediada gəzən şayiələrin 90 faizi yalandı. Bir də mən burda azərbaycanlı olaraq tək deyiləm. Onlar da eyni fikirdədi. Dünya çempionatı ilə bağlı birbaşa təşkilat komitəsində olmasalar da, müxtəlif şirkətlərdə 170-dən çox azərbaycanlı işləyir. Mən də onlardan biriyəm. Amma həqiqətən də mediada yayılan məlumatlar yalandı.

- DÇ-nin keçirildiyi ölkədə işləmək hamının arzusudu. Hansı hissləri keçirirsiz?
- Həqiqətən özümlə fəxr edirəm ki, azərbaycanlı olaraq, belə tədbirə qatılmışam. Çox məsuliyyətli vəzifəni icra edirəm. Final matçının İT işlərinə cavabdeh olacam. Bu səbəbdən də fəxr edirəm. Bütün azərbaycanlılar kimi həmişə ölkəmizin adını uca tutmağa çalışıram.

- DÇ-də hansı yığmaya azarkeşlik edirsiz?
- Yaponiyaya! Çünki Qətərdən öncə orda yaşamışam. Həqiqətən möhtəşəm və sevimli ölkədi. Onların Argentinanı məğlub etməsi məni çox sevindirdi. Ümid edirəm ki, turnirin qalibi olarlar.

İLKİN SULTANLI