Cari mövsümdə də xoş təsir bağışlamayan “Mançester Yunayted”in baş məşqçisi Erik ten Haq klub rəhbərliyini xəbərdar edib ki, sağa-sola yeni müqavilə paylamasın.

Niderlandlı mütəxəssis hələ ki ona kimin lazım olacağını müəyyənləşdirməyib.
Gələn yay birdən-birə səkkiz futbolçu azad agent olacaq. Ancaq onların hər birinin müqaviləsində müddətin 2024-ə qədər uzadılmasının mümkünlüyü ilə bağlı bənd var. “Seçilmişlər”, yəni ilk növbədə qərar qəbul etməli olanlar sırasına Kriştiano Ronaldo, David De Xea, Markus Reşford, Lük Şou, Fred və Doqo Dalot daxildi.

Ten Haq bu futbolçuların gələcəyi ilə bağlı yekun qərar verməmiş dünya çempionatına görə yaranacaq fasilə ərəfəsində komandasını daha yaxından tanımaq istəyir. Belə qərar heç bir halda son turda “Mançester Siti”dən alınan sarsıdıcı məğlubiyyətlə (3:6) bağlı deyil. Baş məşqçi hələ də kimlərin ona gələcəkdə lazım olub-olmayacağını müəyyənləşdirmək prosesindədi.

“Yunayted” rəhbərliyində təmsil olunanlardan biri “The Telegraph”a belə deyib:

Əvvəlki illərdə Ed Vudvordu – klubun sabiq vitse-prezidentini tez-tez onda ittiham edirdilər ki, düşərgəyə hədsiz çox futbolçu yığır, tez-tez müqavilələrin avtomatik uzadılması və ya bunu haqq etməyən futbolçularla uzunmüddətli müqavilə bağlamaq praktikasına əl atır. Belə müqavilələr klub iqtisadiyyatına dağıdıcı təsir göstərirdi. Ten Haq belə praktikadan uzaq durmağa çalışır və ona can atır ki, futbolçular özünü rahatlıq zonasında hiss etməsin və yeni müqaviləni ağır zəhmətin nətcəsində qazansınlar.

Belə ehtimal var ki, bəzi oyunçular yayda klubu havayı tərk edəcək. Məsələn, Fil Cons. Başqalarına gəlincə, klub satış naminə müqavilə müddətini uzatmaq bəndindən yararlana bilər. Ötən “transfer pəncərəsi”ndə 9 futbolçu müxtəlif səbəblər üzündən “Yunayted”i tərk edib: Pol Poqba, Cessi Linqard, Edinson Kavani, Nemanya Matiç, Xuan Mata, Li Qrant, Erik Bayi, Aleks Telles və Andreas Pereyra. İnsayderlər iddia edirlər ki, klub əvvəllər nə vaxtsa yararlı ola biləcək bütün futbolçuları düşərgəyə dəvət etməklə dərin uçuruma düşüb. Görünür, unudublar ki, futbolçu ilk növbədə uğura ac və motivasiyalı olmalıdı. İndi “Yunayted”də maaş cədvəlinə nəzarət güclənib.