Futzal yığmamız sabah DÇ-2024-ün əsas mərhələsində ilk oyununa çıxacaq. Joze Alesionun komandası Bakı İdman Sarayında Polşa ilə qarşılaşacaq.

“CBC Sport” telekanalı görüşü canlı yayınlayacaq.

Azərbaycan – Polşa

DÇ-2024-ün əsas mərhələsi, 6-cı qrup
Hakimlər: Aslan Qalayev, Talqat Kosmuxambetov, Turexan Tursumbayev (hamısı Qazaxıstan).
Hakim-inspektor: Sven Eykler (Almaniya).
UEFA nümayəndəsi: Andrey Medvedev (Belarus).
Saniyəölçən: Rza Məmmədov (Azərbaycan).
7 oktyabr. Bakı İdman Sarayı. Saat 20.00
Seçmə mərhələyə qələbə ilə başlamağı hədəfləyən yığmanı heç də asan sınaq gözləmir.

Nəzərə alaq ki, Polşa Bakıya səfər ərəfəsində hesabına 3 xal yazdırıb. Daha dəqiq desək, sentyabrın 19-da doğma meydanda Yunanıstanı 3:0 hesabıyla üstələyib. Heyətlə bağlı müəyyən problemlər yaşayan Alesio boşluğu aradan qaldırmaq üçün daha iki futzalçıya dəvət göndərib. Söhbət karyerasını Belçika “Beşiktaş Gent”ində davam etdirən Xətai Bağırovla İsa Atayevdən gedir. Onlar dünən düşərgəyə qoyulub. Bununla belə, komanda uğurlu start götürməyə çalışacaq. Bu həm də Yunanıstanla növbəti görüş ərəfəsində əhval-ruhiyyənin yüksəldilməsi baxımından vacibdi. Polşa səddi itkisiz keçilsə, oktyabrın 11-də səfərdə daha zəif yunanları yenmək problem olmamalıdı.