''Qalatasaray''da həllini gözləyən əsas problemlərdən olan baş məşqçi məsələsi praktiki cəhətdən yekunlaşmaq üzrədi.

Qeyri-adi nəsə baş verməyəcəyi halda ən qısa müddətdə Okan Buruk İstanbul nəhənginin yeni baş məşqçisi elan olunacaq.

Əvvəlcə qeyd edək ki, Domenek Torrent dünən vətəni İspaniyadan İstanbula qayıdıb. O, yeni başqan Dursun Özbəkin tələbi ilə təzminat məsələsinin həlli üçün Türkiyəyə dəvət olunub. Təcrübəli mütəxəssisin təzminatı 1,5 milyon avroya bərabərdi və rəhbərlik bu məbləği mümkün qədər aşağı salmağa çalışacaq. Yeni baş məşqçiyə gəlincə, ilk növbədə Roberto De Zerbi və Marko Roze kimi mütəxəssislərlə danışıqlar aparıldığını xəbər vermişdik. Amma onların illik ən azı 5 milyon avro tələb etməsi və başqa istəkləri rəhbərliyin diqqətini Okan Buruka yönəltməsinə səbəb oldu. 48 yaşlı çalışdırıcı son günlərdə ailəvi səbəblər üzündən Parisdə idi. Onunla telefonla əvvəlcə idman direktoru Cenk Ərgün və sonra da başqan Özbək özü söhbət edib. Burukun ''Qalatasaray''ın qarşısına maddi cəhətdən heç bir şərt qoymaması, əksinə, bu klubda işləməyin onun üçün böyük qürur olduğunu deməsi rəhbərliyin xoşuna gəlib. Burukun bu gün Türkiyəyə qayıtması gözlənilir.

Beləliklə, Torrentlə yollar rəsmi şəkildə ayrıldıqdan sonra Okan Buruk ''Qalatasaray''ın yeni baş məşqçisi olacaq! Onunla ikiillik müqavilə imzalanacaq. ''Fanatik''in yazdığına inansaq, Burukun köməkçiləri də artıq bəllidi. Bu, vaxtilə ''Qalatasaray''da onun komanda yoldaşı olmuş Əmrə Aşık və daha öncə ''Qalatasaray''ın akademiyasında işləyən, eləcə də ''Roma''nın U-15 komandasını çempion edən Tuğbərk Tanrıvermişdi. Təyinat rəsmiləşdikdən sonra, təbii ki, bu məşqçinin karyerasına daha ətraflı toxunacağıq.

Hələlik isə xatırladaq ki, futbolçu kimi iki fərqli dönəmdə ümumilikdə 11 il ''Cim-Bom''un şərəfini qoruyan Buruk klubda 7-si çempionluq olmaqla ümumilikdə 15 titul qazanıb. Məşqçi kimi isə 7 klubda çalışıb və 2 titul əldə edib. Buruk 2018-də ''Akhisarspor''la ölkə kubokunu qazanıbsa, hələ ki ən böyük uğuru 2019/20-də ''İstanbul BŞ'' ilə qazandığı ölkə çempionluğudu.