Marselonun cari mövsümün əvvəlində “Lion”dan niyə qovulduğuna aydınlıq gəlib.

Sən demə, oyundaşlarını məsxərəyə qoyması ona baha başa gəlib.

Fransa klubu Liqa 1-in 2-ci turunun ötən il avqustun 15-də “Anje”yə 0:3 hesabı ilə uduzulan oyunundan sonra braziliyalı müdafiəçi ilə müqaviləyə xitam vermişdi. Qış “transfer pəncərəsi” dövründə “Bordo”ya keçən Marselo ilə müqaviləni ləğvinin təfərrüatları yalnız indi müəyyənləşib.

Sports.fr portalının xəbərinə görə, 34 yaşlı futbolçu “Lion”un paltardəyişmə otağında ab-havanı korladığı üçün qovulub. O, səfər matçında topu öz qapısına göndərməsinə baxmayaraq, komanda yoldaşlarına gülübmüş. Təcrübəli futbolçunun bu hərəkəti klub rəhbərliyini qəzəbləndirib və onunla müqavilə ləğv olunub.