Simeone ''Atletiko''nun oyununu tənqid edənlərə nə dedi?
Çempionlar Liqasının 1/4 finalının ''Mançester Siti''yə qarşı ilk oyununda sərgilədiyi hədsiz müdafiə futbolu ilə futbolsevərlər və futbol adamları tərəfindən sərt tənqid atəşinə tutulan ''Atletiko''da baş məşqçi Dieqo Simeone cavab oyunu ərəfəsində tənqidlərə cavab verib.
Hər kəsin fikrinə hörmətlə yanaşdığını bildirən argentinalı mütəxəssis bunları deyib:''Birinci dəfə deyil ki, bu mövzuda tənqidlər eşidirəm. Amma hər zaman bununla bağlı iradlara eyni cür cavab verirəm. 2005-dən bəri məşqçilik sahəsindəyəm. Heç vaxt həmkarlarıma hörmətsizlik etməmişəm. Çünki belə anlarda özümü onların yerinə qoyuram. Hər kəsin futbola özünəməxsus baxış tərzi var. Kimsə bizim oyunumuza ağız büzürsə, o demək deyil ki, dərhal onun cavabını verməliyəm. Bunlar fanatların, keçmiş futbolçuların fikirləridi. Hər kəsin sərbəst şəkildə öz fikrini bildirməyə haqqı var. Dediyim kimi həmkarlarıma və onların fikirlərinə hörmətlə yanaşdığım üçün məsələni uzatmaq istəmirəm. Cavab matçında həmişəkindən fərqli futbol oynamayacağıq. Boşluq tapmalı və fürsətlər yaxalamalıyıq. Bunun üçün müdafiədən hücuma çıxışlar və əks-hücumlar zamanı daha sürətli olmalıyıq. Ümid edirəm ki, bizim üçün unudulmaz və tarixi bir axşam olacaq. Oyuna əla motivasiya olunsaq da, belə qarşılaşmalarda hər şey baş verə bilər''.
Digər xəbərlər
