"Sabah" rəhbərliyi onunla bağlı hansı qərarı verəcək? - AÇIQLAMA
Birinci divizionun 19-cu turu çərçivəsində baş tutan MOİK – "Sabah-2" (0:0) matçında dava düşüb.
Görüşün 65-ci dəqiqəsində "tələbələr"in futbolçusu Mixeil Erqemlidze "hərbçilər"in müdafiəçisi Rüstəm Rüstəmovu vurub. Qarşılaşmanın baş hakimi Rəvan Həmzəzadə isə gürcüyə birbaşa qırmızı vərəqə göstərib.
Başverənləri öyrənmək üçün "Sabah-2"nin baş məşqçisi İlqar Mənsimov ilə əlaqə saxladıq:"İlk baxışda kamerada dediyiniz kimi görünə bilər. Amma Erqemlidze rəqibini vurmayıb. Əslində orda səbəb var idi. Rəqib onu 2-3 dəfə tutmuşdu. Həmin an perspektivli hücum olduğu üçün bu hal yaşandı. Videoda yaxşı görünür. Əli ilə qucaqlayır futbolçumuzu. Duranda da ani olaraq dartışırlar. Əli ilə rəqibin əlinə vurur. Bəziləri deyir, sillə vurub. Amma elə deyil. Videoya dəfələrlə baxdım, elə bir şey görmədim. Sonra rəqib onu yenə itələyir. Erqemlidze əsəbi idi. Çünki bir neçə dəfə oyun ərzində bu hal yaşandı və hakim müdaxilə etmədi. Futbolçumuz da özünü saxlaya bilmədi. Biz hər oyundan öncə futbolçularla danışırıq. Heç kim istəməz ki, belə hadisə baş versin. Dünən rəhbərliklə də danışmışıq. İclas keçiriləcək, tədbir görüləcək. Cəzalanıb-cəzalanmayacağına klub qərar verəcək".
Mənsimov hədəflər və lider "Qaradağ Lökbatan"ın çempionluq perspektivi haqda da danışdı: "Qarşımıza çempionatda hansısa vəzifə qoyulmayıb. Məqsədimiz əsas komandaya, yığmalara futbolçu hazırlayıb verməkdi. Milli komandaların son toplanışına klubumuzdan xeyli futbolçu getdi. Bununla belə, çempionatda yüksək yerlərdən birini tutmaq istəyərdik.
Mövsüm hələ davam edir, hər şey ola bilər. Bir oyunçu komanda üçün hər şey deməkdi. Hələ ki "Qaradağ Lökbatan"da hər şey qaydasındadı. Çempionluğa çox yaxındılar. Hətta "məsələni həll ediblər" deyə bilərik. Bir-iki oyunçu itirsələr, onları əvəz edə biləcəklərmi? Bax, bunu bilmirəm. Daha çox onların çempion olacağına inanıram".
GÜNAY VƏLİYEVA
Digər xəbərlər
