“Zirə” xeyli qol imkanını boşa verdi. Səfərdə məğlubiyyəti anlayışla qarşılamaq olar. Ancaq evdə lazım olan qədər qol vura bilməmək, təbii ki, bu cür nəticələnməlidi. Düzü, buna görə nə Rəşad Sadıqovu, nə də futbolçuları qınamaq mümkündü. Çünki komanda həqiqətən də xeyli hücum etdi. Heyət keyfiyyətlidi. Top iki dəfə dirəkdən qayıtdı, bir dəfə tirin bir qədər üstündən keçdi. O başqa məsələ ki, qüsursuz oynamadılar. Komandada diqqətsizlik hiss edilirdi. Bununla belə, “Payde” ilk oyunda olduğu kimi, burda da azsaylı fürsətlərdən yararlana bildi”.

“Etiraf edək ki, “Neftçi”nin mərhələni keçə bilməyəcəyi Bakıda bilinmişdi. Evdə 2:0 hesablı üstünlük əldən verilirsə, cəzasız qalmır. Həmçinin komandanın hücum xəttində çıxış edən futbolçularında aqressivlik yox idi. Yalnız Emil Səfərov meydana çıxandan sonra fəallıq hiss olundu. Həmin epizodlardan birində topu boş qapıya göndərmək alınmadı. “Neftçi”yə daha çox qol lazım idi. Ancaq hesabı erkən açsalar da, davamını gətirə bilmədilər”.

“Qarabağ” qətiyyən ötən mövsüm Çempionlar Liqasında çıxış edən “Qarabağ” deyil. Həminki sürət hiss edilmir. Belə də olmalıdı. Çünki heyətdən Kamilo Duran, Leandro Andrade, Kevin Medina kimi möhtəşəm, hətta deyərdim ki, əvəzolunmaz futbolçular ayrılıb. Yeni gələnlərin komandaya uyğunlaşması üçün vaxt lazımdı. Ancaq bu heyətlə də ÇSKA-nı keçmək olardı. Sadəcə, “Qarabağ” oyun ərzində üç yüzfailzik qol epizodunu dəyərləndirə bilmədi. Kollektiv “Benfika” ilə oyunda çoxlu hücumla yadda qalmamışdı. Qələbəni azsaylı fürsətlərdən yararlanmaqda əldə etmişdi. “Kopenhagen”ə qarşı oyunun yalnız ilk hissəsində yaxşı oynamışdılar. İkinci yarıda rəqib üstün çıxış etmişdi. Ancaq ələ düşən şanslar boşa verilməmişdi. Bu gün Abdulla Zubirin yorğun olduğu, Kadi Borgesin formada olmadığı açıq-aşkar görünür. Komanda həmin sürətə çata bilmir. Penalti seriyasında da qələbə qazanmaq mümkün idi. Lakin ÇSKA-nın qapıçısı daha inamlı oynadı. Bəlkə də xeyirlisi bu imiş. “Qarabağ” Konfrans Liqasında nəinki liqa mərhələsinə vəsiqə qazana, hətta pley-off mərhələsinə də yüksələ bilər. Ümid edək ki, futbolçular qısa zamanda heyətdə uyğunlaşacaq. Düzü, yeni oyunçular haqda nəsə demək olmur. Savo sanki uyğunlaşmışdı, ancaq zədələndi. Qalanlarının isə yaxşı və ya pis olduğunu zaman göstərəcək. “Qarabağ”da keyfiyyətli olsa da, özünü doğrulda bilməyən futbolçular da olub, bundan oyunçu olmaz desək də, bizi təəccübləndirənlər də. Ümumiyyətlə, hər üç klubumuzun uğursuzluğunu bəxtsizliklə əlaqələndirirəm. Çünki “Zirə” və “Neftçi” uduzmadı, “Qarabağ” isə penalti seriyasına qədər döyüşdü”.