“Düşünürəm ki, mövsümün sonuna qədər premyer-liqanı tərk etməmək uğrunda mübarizə məhz “Kəpəz”lə “Qəbələ” arasında gedəcək. Çünki onlardan yuxarıda olan “Sabah”dı. Murad Musayevin yetirmələri isə 8-ci pillədə qalmayacaq, hətta 4-cü sıraya qədər qalxa bilər. Hər iki autsayderin işi ağırdı. “Kəpəz” “Qarabağ”a böyük hesabla (1:7) məğlub olandan baş məşqçisi dəyişdi. Etiraf edək ki, komandada da xeyli irəliləyiş var. Oyunçuların hadisələrə yanaşma tərzi belə dəyişib. Lakin “Qəbələ” ilə müqayisə etsək, “Kəpəz”in işi daha ağırdı. Çünki Ağdam təmsilçisi bütün rəqiblərinə münasibətdə amansız davranır. Çempionat başlayanda demişdim ki, ilk turlarda istənilən komanda “Qarabağ”a qalib gələ bilər. Çünki “köhlən atlar” Avropa meydanlarında çıxış edəndə premyer-liqada gücsüz olurdu. Məncə, ağdamlılar yerli oyunçuların potensialı baxımından rəqiblərini üstələmirdi. Onların oynadığı matçlarda az da olsa, məğlub olmaq şansları var idi. Təbii ki, bu, qış fasiləsinə qədər mümkün idi. “Qarabağ” Aleksey İsayevi almaqla bu boşluğu aradan qaldırdı. “Kəpəz” bu gün “Qarabağ”ın ən güclü heyətinə qarşı oynayacaq. Bir xal qazansalar, böyük uğur əldə etmiş olacaqlar. Gəncə təmsilçisi bunu iki yolla edə bilər: ya rəqibi meydanın özünə aid hissəsinə sıxıb təzyiq göstərməlidi, ya da arxa xətdə sıx birləşib əks hücumlarda xoşbəxtlik axtarmalıdı. Yenə də “Qarabağ”ın qarşısını nə dərəcədə ala biləcəkılərini demək çətindi”.

“Neftçi” “Qarabağ” qədər üst səviyyədə deyil. “Sumqayıt” və “Zirə” daha az büdcəylə “Neftçi”ni qabaqlayırsa, bu, ümumi durumun yaxşı olmaması mənasına gəlir. Elmar Baxşıyevin yetirmələri həmişə hücumameyilli çıxış edir. Məncə, “Neftçi” ilə oyunda da qol epizodları yaradacaqlar. “Qəbələ” “Kəpəz”in “Qarabağ”la qarşılaşmasından yararlanıb “Neftçi”ni məğlub etməlidi. Belədə əsas rəqiblə xal fərqini azalda, hətta ona çata bilər. Onu da deyim ki, “Kəpəz”in oyunu Gəncədə keçirilsə, nəyəsə ümid etmək olardı. Lakin Qəbələdəki stadionun ot örtüyü yaxşı səviyyədədi. Bu isə “Qarabağ” üçün münasibdi”.