"Əslində Rəşad Sadıqovun sözlərində həqiqət var. O, baş məşqçi kimi komandasındakı inkişafı daha yaxşı görür. Onu deyə bilərəm ki, ötənilki "Zirə" daha zəif təsir bağışlayırdı. Oyunçuların keyfiyyəti daha aşağı idi. Komanda praqmatik və qapalı oyun tərzinə üstünlük verirdi. Sadəcə, lazım olan qolu vurmağa hesablanan tərzdə çıxış edirdilər. İndi oyunçuların keyfiyyəti artıb. Daha dominant çıxış edirlər. Bəli, nəticələrə görə hansısa enişdən danışmaq olar. Bu mövzuda Rəşad Sadıqovla razı olmayanlar haqlıdı. Uduzursansa, bəzi məsələləri keçmişlə müqayisə etmək mümkündü. Məsələn, "Zirə" "Neftçi" ilə son oyunda 1 xala layiq idi. Göstərilən oyuna, yaradılan qol vəziyyətlərinə əsasən bunu demək mümkündü. "Zirə"nin qapıçısı (Aydın Bayramov - red.) "Neftçi"nin ikinci qolunu dəf edə bilərdi. Bir az ustalıq səviyyəsi olan qolkiper belə zərbələri zərərsizləşdirmək məcburiyyətindədi. Qısası, "Zirə" oyun baxımından xeyli "artırıb". Məncə, Rəşad Sadıqov haqlıdı. Sadəcə, bir çox hallarda bəxtsizlik olur və bu, nəticəyə təsir edir. Ötənilki "Zirə" xallar qazansa da, oyun baxımından qane etmirdi. İndi isə baxımlı və dominant oyun göstərirlər. Sadəcə, fərdi səhvlər üzündən asan qollar buraxırlar. Belədə ümumi performans kölgədə qalır".