“Məğlubiyyətin əsas səbəbi birmənalı şəkildə qırmızı vərəqədi. Bu səviyyədə oyunlarda bir nəfərin azlığı matçın taleyini həll edir. Məsələn, AÇ-2024-də Türkiyə - Çexiya qarşılaşmasını yada salaq. Yüzdəyüz əminəm ki, qırmızı vərəqə olmasaydı, Türkiyə millisi qalib gələ bilməyəcəkdi. Yəni həmin oyunda türklər üstün olmalarına baxmayaraq, çətinliklə qələbə qazandı. Bu, “Zirə”nin oyununa da aiddi. “Qırmızı” görüşdə həlledici amil oldu. “Zirə” vərəqəyə qədər pis təsir bağışlasaydı, onda hansısa səhvlərlə bağlı şərh vermək olardı. Həmçinin nəzərə almaq lazımdı ki, “Şerif”in heyətindəki bir çox futbolçu Afrika qitəsindən, öz millilərinin əsas oyunçuları idi. Düşünürdüm ki, daha çətin olacaq. Lakin “Zirə” hər şeyi təhlil etmişdi və həmin təhlilin əsasında da demək olar ki, “arılar”ın oyunçularını zərərsizləşdirmişdilər. Oyunun əvvəlində qol da vurdular. Oyunun axarına nəzarət təmsilçimizin əlindəydi. Topu itirdikləri an 5-6 saniyə ərzində yenidən ələ keçirə bilirdilər. Əminəm ki, “qırmızı” olmasaydı, hesab 2:0 və ya 3:0 da ola bilərdi. Amma şüursuz bir hərəkət - hansı ki, bunu yalnız futbolçunun təcrübəsizliyi ilə əlaqələndirə bilərəm – hər şeyi korladı. Doğrudu, hakimin qərarı sərt oldu. Adətən, belə epizodlarda sarı vərəqə ilə də kifayətlənmək olur. Çünki bu, həddən artıq sərt epizod deyildi. Bəli, əllə toxunuş var, amma “qırmızı” vərəqəlik deyildi. Hər halda, artıq hakim qərarını vermişdi. Ondan sonra “Şerif”in futbolçuları oyuna nəzarəti ələ keçirə bildi. Nəticə etibarıyla da cütün taleyini penaltiyə qədər apardılar. Penalti seriyasında artıq qınanılacaq bir şey yoxdu. Çünki dünya ulduzları da bəzən bu zərbələri qola çevirə bilmir. Elə yaxın keçmişdə portuqaliyalı superulduz Kriştiano Ronaldo bunu bacarmamışdı. Buna görə “Zirə”nin oyunçularını qınamaq çox da ədalətli yanaşma deyil. Penalti seriyası yalnız psixoloji amildi. Futbolçunun həmin andakı psixoloji durumundan asılı olur. Onun da məşqçiylə heç bir əlaqəsi yoxdu. Bu üzdən də qınanılası kimisə görmürəm. Bəlkə də təkcə Salifu Sumanı qınamaq olar. Çünki belə vəziyyətlərdə necə davranış sərgiləməli olduğunu bilməlisən. Doğrudu, “Zirə” hesabda geridə olduğu halda belə, bəzi qol imkanları oldu. Dirəkdən qayıdan toplarını nəzərə alsaq, şanssız olduqlarını da deyə bilərik”.