“Dinamo-Minsk”in sabiq baş məşqçisi Sergey Qurenko futbolun sevilmə səbəblərindən biri kimi burdakı duyğulardan bəhs etmişdi. Bakıdakı matçda məhz həmin duyğunun dadını öyrəndik. Oyun məhsuldar və ləzzətli oldu. Əlbəttə, ilk 10 dəqiqədə iki qol buraxmaq faciə ilə nəticələnə bilərdi. Ancaq rəqibin uğuru “Dinamo”nun qələbəsi üçün əlverişli şərait yaratdı. “Neftçi”nin çətin rəqib olmadığını bilirdik. Çünki bu komanda mövsümü mükafatçılar sırasında bitirməsə də, “Sabah”ın ölkə kubokunu qazanması sayəsində Konfrans Liqasında çıxış etmək hüququ qazanmışdı. Rəqibin heyətində cəmi bir yerli futbolçu var idi. Söhbət Emin Mahmudovdan gedir ki, kapitan hər iki qolun vurulmasında böyük rol oynadı. “Dinamo” isə meydana cəmi üç legionerlə çıxmışdı. Düzdü, bu məqam ölkələrin fərqli legioner limiti əsasında çempionat təşkil etmələriylə bağlıdı. Fakt budu ki, “Neftçi” belə böyük üstünlükdən yararlana bilmədi. Hər halda, “Dinamo” 0:2 hesabıyla geri düşsə də, 4 qol vurmağı bacardı. Xatırlayırsızsa, oxşar hadisə ilə “Neman” da üzləşmişdi. Ötən mövsüm Konfrans Liqasının 2-ci təsnifat mərhələsində, iyulun 24-də “Koşitse”nin qonağı olan Qrodno təmsilçisi iki qol buraxmış, sonradan üç dəfə fərqlənərək qalib gəlmişdi. Bu gün isə “Dinamo” uğura doğru irəliləyir. Görünən odu ki, “Braqa” ilə qarşılaşacağıq”.

“Dinamo” imzasını Bakıda da atdı. Komanda gözlənilən futbolu sərgilədi. Sərbəst qaçdı, 20-30 metrlik yarışları qazandı, nişan almadan zərbələr endirdi və topu doğru yerlərə göndərdi. Taktiki hiylələrdən yox, sürət və gücdən istifadəyə üstünlük verdi. “Neftçi”nin səhvlərini yalnız yeniyetmələrdən ibarət komandalar edə bilər. Buna istirahətdən yeni qayıtmaları səbəb oldu, yoxsa asan qollar vurmaları? Bunu bilmirik. Ancaq Bakı təmsilçisi 20-ci dəqiqədən sonra o qədər qonaqpərvər oynadı ki, “Dinamo” edə bildiyi ən yaxşı şeyi etməyə başladı: boşluqları yaxşı dəyərləndirdi, fürsətlər yaratdı. Rəqib həqiqətən də yaxşı başlamışdı. Futbolçuların hərəkətləri seçilən düzülüşü anlamağı belə çətinləşdirmişdi. Onlar topa başıboş köpəyə yapışan birələr kimi sarılırdı. Hətta “Neftçi” ilk 10 dəqiqədə daha çox qol vura bilərdi. Yenə də “Dinamo” təşəbbüsü ala bildi. Bu dəfə arxaya doğru edilən uzun ötürmələr işə yaradı. Gözlənilmədən iki qol buraxan “Neftçi” qısa müddətdə tam sıradan çıxdı. “Dinamo” bu qələbəni tanrının hədiyyəsi kimi qəbul etməlidi”.

“Oyundan əvvəl hamı narahat idi. Çünki Bakı təmsilçisi mövsümlərarası fasilədə heyətini gücləndirmiş, meydana favorit kimi çıxmışdı. İkincisi, rəqibin baş məşqçisi Yuri Vernidub Belarus futbolunu yaxından izləyir və bu barədə çox şey bilir. İlk dəqiqələrdə bu narahatlıqların haqlı olduğunu düşünməyə başladıq. Çünki rəqib erkən qollar vurdu. Ancaq sonradan heç kimin gözləmədiyi hadisə baş verdi. “Neftçi” arxayınlaşdı və oyuna ciddi yanaşmadı. Rəqib nəticəni qorumağa üstünlük verdi və qapımıza təzyiqi böyük ölçüdə azaltdı. Bu ərəfədə atmosferə uyğunlaşan Minsk komandası təşəbbüsü ələ aldı və lazım olan qələbəni qazandı”.