Konfrans Liqasında mübarizəyə 2-ci təsnifat mərhələsindən başlayacaq “Neftçi”nin “Dinamo Minsk”ə rəqib olduğundan xəbərdarsız. Belarus paytaxtını təmsil edən komanda evdəki (daha dəqiqi, Bolqarıstanın Stara-Zaqora şəhərindəki) ilk oyunda Şimali Makedoniya təmsilçisi “Sileks”ə 0:1 uduzsa da, səfərdə eyni hesabla qalib gəlib, ardından penaltiləri daha dəqiq yerinə yetirməklə növbəti mərhələyə adlayıb.

“Neftçi” üçün maraqlı ola biləcək bir məqamı vurğulamaq istəyirik. Rusiya Ukrayna ərazisini işğal etmək üçün müharibəyə başlayandan bəri Belarus klublarının da avrokubok oyunlarını evdə keçirməsinə qadağa qoyulub. “Football-plus.az” xəbər verir ki, “Dinamo Minsk” üçün isə buna qədər də ev-səfər anlayışı yox idi. Belə ki, paytaxt klubu tarixində 3-cü dəfə evdəki arzuolunmaz nəticənin ardından mərhələ adlamağı bacarıb.

İntertoto kuboku, 2004/05 mövsümü. Dinamo – Sartid (Serbiya) evdə 0:1, səfərdə 3:1 (əlavə vaxtda)

Avropa Liqası, 2009/10 mövsümü. Dinamo – Lokomotiva (Xorvatiya) evdə 1:2, səfərdə 3:2

Konfrans Liqası, 2026/27 mövsümü. Dinamo – Sileks (Ş.Makedoniya) evdə 0:1, səfərdə 1:0, p. – 6:5

“Neftçi”nin tarixində isə yalnız bir belə nümunə var. “Ağ-qaralar” “Koper”dən evdəki məğlubiyyətin əvəzini çıxa bilib.

Avropa Liqası, 2014/15 mövsümü. Neftçi – Koper (Sloveniya) evdə 1:2, səfərdə 2:0