Xəbər verdiyimiz kimi, yay təlim-məşq toplanışının əsas mərhələsini Avstriyanın Tirol bölgəsində keçən "Sabah" yoxlama oyunlarında qələbəyə həsrət qaldı. "Universitetya Krayova" və "Ferentsvaroş"la 1:1 hesablı "sülh"ə imza atan komanda "Polessye"yə uduzdu (1:4).

"Football-plus.az"ın məlumatına görə, Masazır təmsilçisinin baş məşqçisi Valdas Dambrauskas son oyunda aşağıdakı start heyətinə şans verdi.
Stas Pokatilov, Umarali Raxmonaliyev, Aleksey İsayev, İvan Lepinitsa, Stov Solvet, Junior Almeyda, Aaron Maluda, Patrik Orfe Mbina, Velko Simiç, Timoteuş Puxaç.

Rəhman Daşdəmirov, Coy-Lens Mikels, Yunes Laşaab, Rauf Rüstəmli, Cafet Dunqus, Eyden Makkarti, Cəfər Muxtarov, Kahim Parris və Abdulla Xaybulayev isə sonradan meydana daxil oldu.

Əlbəttə, ölkəmizi Çempionlar Liqasında təmsil edəcək "bayquşlar"ın nəticələri narahatlıq doğurur. Nəzərə alaq ki, litvalı mütəxəssis bütün matçlarda, demək olar, aparıcı futbolçulara şans verib. Belədə, əvvəl də bildirdiyimiz kimi, "Sabah" üçün SOS həyəcan siqnalı qüvvədədi.

Xatırladaq ki, tarixində ilk dəfə ÇL-yə qatılacaq “bayquşlar” 1-ci təsnifat mərhələsi çərçivəsində iyulun 7-də “Bank Respublika Arena”da Uels “Nyu Seynts”ini sınağa çəkəcək. Matç saat 20.00-da başlayacaq. Cavab görüşü bir həftə sonra olacaq. “Bayquşlar” iyulun 14-ü, Bakı vaxtıyla saat 21.30-da İngiltərənin Osvestri şəhərində yerləşən “Park Hall”da meydana çıxacaq.

KƏNAN BAHADIR