“Zirə”nin Konfrans Liqasında rəqibi olan “Torpedo”nun işləri yolunda getmir.

“Football-plus.az”ın məlumatına görə, klubun cari durumu azarkeşlərinin narazılığına səbəb olub. Tərəfdarlar bu barədə fikirlərini Kutaisi təmsilçsinin sosial şəbəkə hesablarında qeyd ediblər. Onlar “Zirə”ni mübarizədən kənarlaşdıracaqlarına inanmırlar. Çünki hazırda klubda hərc-mərclik hökm sürür. Heyət kasaddı, maliyyə problemləri var. İş o yerə çatıb ki, hətta bəziləri klubun “qartallar”ı keçmək şansının möcüzəyə bərabər olduğunu bildirir.

Düzdü, “Zirə”nin münasib rəqib olduğunu düşünənlər də var. Ancaq onlar da bunun üçün heyətin gücləndirilməsini tələb edir. İş ondadı ki, “Torpedo” sonuncu transferini bu ilin fevralında reallaşdırıb. Görünür, komanda “qartallar”ın önünə böyük ölçüdə indiki heyətlə çıxacaq. Öz aramızdı, belədə Kutaisi təmsilçisinin işi xeyli çətin olacaq. Ona görə ki, bu futbolçular hələ bir neçə gün əvvəl keçirilən çempionat matçında autsayderlə bacarmayıb. Əlbəttə, belə vəziyyət azarkeşlərin qəzəblənməsinə və narazılığının artmasına səbəb olub.

Kəsəsi, “Zirə” üçün 2-ci təsnifat mərhələsinə vəsiqə qazanmaq gözlənilən qədər çətin olmayacaq. “Qartallar” yaxşı hazırlaşmalı və rəqibi diqqətlə təhlil etməlidi.

Xatırladaq ki, komandalar arasında ilk oyun iyulun 8-i, saat 20.00-da “SOCAR Polymer Arena”da keçiriləcək. Cavab matçı isə iyulun 16-da, Bakı vaxtı ilə saat 20.00-da Kutaisidə - “Ramaz Şengeliya”da olacaq.

KƏNAN BAHADIR