Türkiyədə yay transfer dönəminin ən fəal klublarından olan ''Trabzonspor'' mühüm bir keçidi açıqlayıb. İyulun 1-də 4 futbolçu - Metehan Mimaroğlu, Samet Akaydın, Tyerri Karadəniz və Melih Kabasakalın transferini açıqlayan, eləcə də Kazim Olaiqbeni ''Bazel''ə icarəyə verən Trabzon təmsilçisi Andre Onananı daha bir il heyətdə saxlamağa müvəffəq olub. Tanınmış kamerunlu qapıçı bilindiyi kimi ötən yay ''Mançester Yunayted''dən birillik icarəyə götürülmüş və ümidləri doğruldaraq performansı ilə diqqət çəkmişdi. Rəhbərliyin ''Yunayted'' ilə apardığı danışıqlar uğurla yekunlaşıb və Onana daha bir illik müddətə icarəyə götürülüb. 30 yaşlı qapıçının illik maaşı 3,5 milyon avro təşkil edəcək. Bundan başqa ona 2 milyon avro imza parası veriləcək. ''Trabzonspor'' daha 1,5 milyon avronu isə icarə haqqı kimi ödəyəcək. İcarə müddəti bitdikdən sonra 30 yaşlı qapıçı gələn yay ''Yunayted''ə qayıtmalı olacaq. Onana ötən mövsüm 33 rəsmi oyunda iştirak edərək 40 qol buraxıb və 6 oyunda qapısını toxunulmaz saxlayıb. ''Trabzonspor''un ölkə kubokunu qazanmasında onun böyük əməyi olmuşdu.