Bu yay heyətini gücləndirəcəyi gözlənilən ''Beşiktaş'' bir futbolçu ilə bağlı yayılan xəbəri rəsmən təkzib edib. Söhbət Henri Onyekurudan gedir.

Türkiyə mətbuatında İstanbul nəhənginin bu futbolçu ilə danışıqlar apardığı barədə xəbərlər peyda olmuşdu. Onyekurunun Türkiyə futbolunu yaxından tanıdığını nəzərə alsaq, onun bu ölkəyə qayıdışı sürpriz olmazdı. Özü də nəzərə alaq ki, 27 yaşlı nigeriyalı vinger sərbəst futbolçuya çevrilmək üzrədi. Amma ''Beşiktaş'' bu iddiaları rəsmən təkzib edərək bu futbolçuya maraq göstərmədiyini açıqlayıb.

Onyekuru daha çox Türkiyədə ''Qalatasaray''ın formasını geydiyi dönəmdə populyarlıq qazanmışdı. O, ''Cim-Bom''da iki fərqli dönəmdə çıxış edərək 2018/19 mövsümündə çempionluq sevinci də yaşayıb. Bundan başqa o, 2022/23-də Türkiyənin digər klubu ''Adana Dəmirspor''da da top qovub.

2023-dən bu yana Onyekuru Səudiyyə Ərəbistanı təmsilçisi ''Əl-Fayha''da çıxış edirdi. Son mövsüm onun üçün uğursuz alındı. Zədə üzündən Onyekuru mövsümdə cəmi 4 oyuna çıxa bildi. Onun ərəblərlə müqavilə müddəti iyunun 30-da başa çatacaq.